Skuldingar førte til tilsyn
Sverre Leo Handegard er skulda for ulovlege terrenginngrep og deponering på Byrkjeland i Jondal. No har Ullensvang kommune sett på området.
Kommunen var på synfaring i det om lag 12 dekar store dyrka feltet 31. oktober. Bakgrunnen var at Svein Jåstad, som eig ei hytte ved ei nabotomt, og ekteparet Ragnhild Jåstad Vågen og Kjell Jostein Vågen, som bur på ei anna nabotomt, sende ei uromelding til kommunen i fjor sommar.
I meldinga hevdar dei at Handegard, som fekk løyve til å dyrka feltet i mai 2018, har deponert stein- og leirmassar i området før det vart planert, dekt med matjord og dyrka. Inngrepet skal ha ført til overvatn, sopp og ròte på deira eigedomar.
– Ulovleg deponi?
Meldarane hevar at Handegard korkje har søkt om eller fått løyve til å utføra terrengarbeid og deponera massar. Dei mistenkjer at ein del av massane er overskotsmassar frå anleggsarbeid.
Tilsynsrapporten kom først 6. mai, etter at Jåstad og ekteparet Vågen purra 29. april. I rapporten skriv kommunen at det er lovleg å fylla på massar før ein dyrkar. I lite tettbygde strok skal ikkje massane heva terrenget med meir enn tre meter. Kommunen kan ikkje sjå at terrenget har vorte meir enn tre meter høgare.
Arealet verkar heller ikkje som eit deponi, står det i rapporten. Det var ikkje synleg ureining eller søppel å sjå under synfaringa. I utgangspunktet treng ein ikkje løyve etter ureiningslova dersom ein fyller på med reine massar.
Med reine massar meiner ein naturlege, mineralske massar. Det er derimot ikkje lov å bruka massar som inneheld behandla mineralske materiale, som til dømes betong og asfalt.
Må svara
Handegard si tilbakemelding er, ifølgje rapporten, at massane som er nytta, er reine. Han har fått ein frist på tre veker, frå rapporten vart publisert, til å oppgje kvar massane kjem frå og kor mykje massar som er tilførte. Han må òg svara på om det er teke prøvar av massane og kva resultata av desse eventuelt er.
Den som dyrkar, har ansvaret for at overvatn vert handtert på ein god måte. Det var ikkje overvatn på eigedomen under synfaringa. Handegard har fått tre veker på seg til å svara på korleis han ser på det som gjeld overvatn.
