Skreiv brev til Statsministerens kontor

8. november vart eit brev frå fire Øystese-elevar journalført på Statsministerens kontor. Det var Hannes Skaar, Aina Sørheim Almeland, Ylva Huse og Hanne Berge som ville kontakta statsminister Jonas Gahr Støre (Ap).

11-åringane fortel at dei hadde samfunnsfag og skulle til å skriva om demokratiet. Då kom Hanne på ideen om å skriva brev til den folkevalde.

Lærar i samfunnsfag, Steinar Hollekve, minnest at nokre elevar ynskte å skriva brev til statsministeren i ein skuletime.

— Dei føreslo det sjølve, og eg sa at det måtte dei berre gjera, fortel Hollekve.

Gratis lunsj

I brevet set elevane fram eit ynske om gratis lunsj på skulen. Dei skriv at det ikkje er alle som har med seg skikkeleg lunsj, og at nokre ikkje har råd til det. Ynsket er at det skal vera gratis på ungdoms- og barneskular i heile Noreg.

— Me var litt svoltne då me skreiv, fortel Hanne.

Vidare skriv elevane at dei er heilt sikre på at Støre vert ein fantastisk statsminister. Om han har stått til forventningane, var vanskeleg å svara på, men Aina tykkjer uansett at han verkar grei.

— Er det viktig å engasjera seg?

— Ja, det er viktig at nokon seier ifrå, seier Aina.

Håpar på respons

Hanne har skrive brev til statsministeren før. Ho tykte det var moro med heimeskule under pandemien, og kunne tenkt seg meir av det. Det fekk dåverande statsminister, Erna Solberg, beskjed om.

— Eg fekk svar av Erna etter eit halvt år. Men svaret var korkje ja eller nei, fortel ho.

Då HF vitja elevane på skulen onsdag i førre veke, var det ikkje kome svar frå Støre.

— Kva tenkjer de om det?

— Det er heilt greitt. Det er statsministeren vår. Han får sikkert hundrevis av brev kvar dag, så eg skjønar at eit brev frå nokre sjetteklassingar ikkje er så interessant, seier Hannes.

Svaret kom

Han håpa likevel at responsen ville koma, og fredag fortalde Hanne at eit brev frå statsministeren var kome i postkassa.

— Kva står det?

— Han skriv at det er bra at me engasjerer oss og sånn. Det er kjekt at han svarar oss, men han kom ikkje med eit ja eller eit nei. Eg hadde håpa på eit tydelegare svar, seier Hanne.

Ho gav beskjeden vidare til Ylva, Hannes og Aina fredag ettermiddag. Hanne seier at dei vart overraska og glade.