Skredfare og radikalisering

Det var statsforvaltar Liv Signe Navarsete som ynskte fylkesberedskapsrådet velkomen på Hardangerfjord Hotel. Navarsete meiner det er viktig at dei som arbeider med beredskap, veit om kvarandre, og at samlinga – som er årleg – er ein god arena for aktørar å verta kjende med kvarandre. Det kjem fram i referatet frå samlinga.

Fylkesberedskapsrådet består av ulike aktørar innan samfunns- og statstryggleik, som til dømes naudetatane, PST, Avinor, Telenor, Kartverket, Mattilsynet og BKK.

Både lokalt og globalt

Alle hendingar skjer i ein kommune, minte Navarsete om. Anita Hesthamar, rådmann i Kvam herad, var med på møtet. Ho nemnde hytteturismen i Kvam som ei utfordring med tanke på beredskap. I feriar og høgtider kan innbyggjartalet verta nesten dobla, sa ho.

Når det gjeld infrastruktur, påpeika Hesthamar at store delar av hovudvegane i heradet er skredutsette, og utfordringane som oppstår når hendingar fører til stenging av europaveg 16.

Også det globale biletet var beredskapsrådet innom. Cecilie Hellestveit, jurist og forskar ved Folkerettsinstituttet, deltok digitalt. Ho snakka om auken i væpna konfliktar i verda og korleis dette kan ramma Noreg. Ifylgje henne vil krig i framtida truleg gå føre i rommet, på sjøen, i datasystem og gjennom informasjon.

– Treng kunnskap

Tidlegare politibetjent ved Kvam politistasjon, Pål Tore Haga, jobbar med radikalisering i Vest politidistrikt, og er med i ekstremismekommisjonen. I ein rapport frå kommisjonen til Arbeids- og inkluderingsdepartementet vart det konkludert med at dei som vert radikaliserte, har ein del fellestrekk, sa han. Mellom trekka er mangelfull omsorg i oppveksten og manglande arbeid å gå til. Han meiner førebygging og heilskapleg innsats og arbeid må til, og at dette er ei oppgåve for heile samfunnet.

Torgils Lutro, leiar i PST Vest, oppmoda alle i rådet om å lesa rapporten. Skule- og helsesektoren er ofte dei som kan oppdaga tilfelle av radikalisering tidleg, men dei treng kunnskap om emnet for å kunna gjera noko, meiner han.