Skreddarsydde båt for beredskap til sjøs

Det opplyser dagleg leiar Bjørnar Vangen.

Båten, ein Pioner Multi III, måler 17 fot og kosta i alt i overkant av ein halv million kroner. Han er spekka med teknisk utstyr som Yamaha Hardanger har skaffa og montert.

– Me kjøper eit tomt skal, og så byggjer me båten slik kunden vil ha han, seier Vangen.

Båten vart stilt ut i samband med at Vest brann- og redningsregion held brannførebyggingsseminar for feiarar på Thon Hotel Sandven 25. og 26. oktober. Kvinnherad brann og redning ynskte å visa båten fram for kollegaene.

Gav best svar

Kvinnheringane kom i anbodet med ein kravspesifikasjon på 60 punkt. Berre Yamaha Hardanger svara på alle punkta. Butikken i Kvam var dessutan billegast og kjappast til å svara på anbodet, opplyser Vangen.

Båten har vorte ein av dei best utstyrte pionerbåtane i Noreg, meiner han. Båten har til dømes fått blålys, ekstra lys og kartplottar, og skal få AIS. Med sistnemnde får ein oversikt over andre båtar på sjøen. Blålyset trengst når ein overstig fartsgrensa. Tryggleiken er lagd stor vekt på.

– Kva merke er motoren?

– Yamaha, sjølvsagt! svarar Vangen.

Motoren er på 80 hestekrefter.

Yamaha Hardanger har tidlegare levert liknande båtar i enklare utgåve til cruisehamna i Eidfjord og til industrivernet og Raudekrossen i Ålvik.

Skal skyssa feiarar

Kvinnherad brann og redning har sakna ein slik båt i fleire år, opplyser avdelingsleiar og varabrannsjef Øyvind Ousdal. Feietenesta, brannvernet og beredskapstenesta skal disponera båten i lag.

Båten har fått namnet «Førebyggaren». Fyrst og fremst skal han transportera feiarane til mange av dei vel 1.700 hyttene som finst i kommunen og som har pipeløp. Mange hytter ligg på øyar.

Det fyrste Ousdal reagerte på då han kom til kommunen i 2010, var at det ikkje var brannbåt å oppdriva, seier han.

Vaktlaget på Husnes, der båten vil vera stasjonert, har fått opplæring på båten. Han vil òg verta nytta i samband med akutte hendingar til sjøs, brann til sjøs og liknande.

– Det er eit kjempeløft for kommunen. Du må skryta veldig av Yamaha Hardanger. Verksemda har fylgt oss godt opp, og me er svært godt nøgde med samarbeidet, seier varabrannsjefen.

– Heradet treng ein òg

– Viss ein hadde hatt ein slik båt då ulukka i Tokagjelet hende, så hadde ein hatt noko å koma seg på sjøen med. Då vart båe båtane Yamaha Hardanger hadde levert i Ålvik, henta inn, seier Vangen, som ikkje er i tvil om trongen for ein slik båt i Kvam, meiner han.

– Men det er ein kostnad, så spørst det om heradet tek seg råd. Når noko skjer på sjøen, har ein ikkje mykje å hjelpa seg med.

Brannsjef Torleif Ones i Kvam herad utelukkar ikkje at heradet vil skaffa seg ein brannbåt. Han opplyser til HF at tenesta i ferd med å ferdigstilla ein analyse i samband med ei ny forskrift. Analysen tek for seg ymse krav til ytingar, mellom anna brann- og redningsberedskap på fjorden.

Han seier målet er å leggja analysen og tilhøyrande planverk fram for dei folkevalde i samband med budsjettet i haust.