Skred i Tokagjelet
Fylkesveg 49 i Tokagjelet vart stengd etter eit skred torsdag morgon.
Stein, tre og jord skulle ha hamna i vegen, opplyste Vegtrafikksentralen klokka 09.19.
I ei oppdatering klokka 09.37 skreiv Vegtrafikksentralen at det berre var eitt felt som var stengt, og at den første meldinga var litt overdriven.
Artikkelen held fram under annonsen.
Eit tre skal ha falle over ein høgspentleidning. Entreprenøren arbeidde med å varsla netteigaren for å få treet bort.
Montørformann Hans Vangdal bemanna vakttelefonen til Kvam Energi Nett AS torsdag føremiddag. Han opplyser at raset i Tokagjelet ikkje påverka kraftleveringa på Kvamskogen.
– Så vidt eg veit, går straumkablane til lysa i tunnelane. Lysa i tunnelane er det vegeigar, altså fylkeskommunen, som har ansvaret for, seier han.
Om lag klokka 11.40 melde Vegtrafikksentralen at det var fri ferdsle i Tokagjelet, men klokka 13.30 kom meldinga om at vegen ville vera stengd ei god stund frå klokka 13.50. Entreprenøren ville prøva å sleppa trafikk forbi kvar halvtime.
