Skøyen vart ikkje varsla

Om du som privat arrangør vil nytta ein idrettshall eller eit anna kommunalt lokale eller område til eit arrangement som vanlegvis ikkje vert avvikla der, må du varsla Kvam brann og redning om det via eit digitalt skjema på den kommunale heimesida. Det skal gjerast i god tid og minst fire veker før arrangementet.

Vel å merka gjeld kravet berre større arrangement, til dømes møte, utstillingar, framsyningar og andre tilstellingar. Større arrangement vil seia arrangement med skjenkjeløyve der det er venta fleire enn 50 gjester, og arrangement utan skjenkjeløyve der minst 150 personar er venta.

Større risiko enn elles

Varslingskravet gjeld også kommunale arrangørar. Noko slikt varsel fekk likevel ikkje Kvam brann og redning om Bygdaskoi, sjølv om kring 800 skal ha vore innom i løpet av dei fem timane tilskipinga vara. Det opplyser Svein Valland Laupsa, som leier den brannførebyggjande avdelinga i heradet. Etter hans vurdering skulle eit slikt varsel vore sendt.

Laupsa understrekar at poenget med slik varsling er å sikra tryggleiken også når eit bygg vert nytta til andre føremål enn det vanlege. Då kan ein nemleg rekna med at brannrisikoen er større enn elles.

Kvam brann og redning skal sjå til at arrangøren har teke dei naudsynte omsyna gjennom mellom anna risikoanalyse med tiltak, vaktoversyn og skildring av mellom anna rømmingsvegar, sløkkjemiddel og tilkome for naudetatar.

– På plass

Anna Mo-Bjørkelund i Kvam herad har ansvar for tilbodet Ung fritid ferie, som Bygdaskoi var ein del av. Også Grannehjelpa var med i arbeidsgruppa, saman med kulturkontoret og utekontakten.

Mo-Bjørklund opplyser at det er laga risiko- og sårbarheitsanalysar (ROS-analysar) av alle aktivitetane i Ung fritid ferie, også Bygdaskoi. Tryggleiken var sikra gjennom omfattande og organisert vakthald, opne naudutgangar, tydeleg avgrensa område og informasjon om brannrutinar til både frivillige og til gjestene.

Det held ikkje for Kvam brann og redning, som altså skal ha slike planar til godkjenning i god tid. Årsaka er at heradet er tilsynsstyresmakt i samband med det nasjonale regelverket for arrangementsberedskap.

Mo-Bjørkelund opplyser at det var ein glipp at informasjonen ikkje nådde fram til Kvam brann og redning. Ung fritid vil gå gjennom rutinar og retningsliner med tanke på nye arrangement.

Ingen tinga plan B

Bygdaskoi skulle ha vore avvikla i parken ved Hardangerbadet, men vart altså flytta innandørs på grunn av dårleg vêr. Plan B var Øystesehallen, men der viste det seg å vera sommarleir i volleyball. Mo-Bjørkelund vedgår at hallen ikkje hadde vorte tinga i god tid, og opplyser at oppgåva fall mellom fleire stolar i arbeidsgruppa på grunn av misforståingar.

Bruken av ungdomsskulen vart avklara med leiinga ved skulen kort tid før arrangementet. Leiar for skule, Inga Lill Jensen Tolo, seier at slik bruk av skular føreset at brukarane får opplæring i mellom anna brannvernrutinar.

I fjor hadde ikkje arrangørane nokon plan B i tilfelle dårleg vêr. Då ville det ha vorte avlyst, opplyser Mo-Bjørkelund. Den gongen var vêret godt, og Bygdaskoi vart avvikla under open himmel.

Fyrst hemmeleg

HF bad i sommar om innsyn i risikoanalysane av alle arrangement i Ung fritid ferie i 2024, men fekk fyrst avslag. Avisa klaga på avslaget 23. august onsdag, sende purring 29. august og fekk 6. september innsyn i delar av ROS-analysen av Bygdaskoi. Sladdinga er grunngjeven med at offentleggjering kan gjera det enklare å gjennomføra straffbare handlingar.

Analysane av dei andre arrangementa er ikkje nemnde i tilbakemeldinga. HF har difor bede om at innsyn også i dei andre analysane vert vurdert.