Skogbrannfare i Kvam og Ullensvang
Meteorologisk Institutt varsla 31. august om skogbrannfare på gult nivå på Vestlandet sør for Stad.
Meldinga gjeld i fyrste omgang til 4. september.
Ifylgje met.no tyder gul farge på skogbrannindeksen «nokon fare». Dette er ein tilstand som oppstår når det ikkje kjem nedbør ofte. Vegetasjon kan lett ta fyr, og store område kan verta råka. Rådet frå instituttet er å vera varsam med open eld. Situasjonen er utfordrande, heiter det frå instituttet.
Det er eit generelt forbod mot open eld i naturen mellom 15. april og 15. september.
Vêrmeldingane lovar framleis turt vêr.
Brannsjef Sigbjørn Kleppe i Odda og Ullensvang Brann og Redning seier til Hardanger Folkeblad at brannvesenet har hengt opp fleirspråklege skilt om skogbrannfare i kommunen.
– Både nordmenn og utlendingar som ferdast i naturen, bør kjenna til faren når det er så tørt, seier Kleppe til oddabladet.
Han var sjølv med då Ullensvang brann og redning saman med politiet rykte ut etter melding om skogbrann på Samlen nyleg. Det tek ein time å gå opp, fortel Kleppe, som hadde fire tilsette oppe på toppen. Der fann dei restar av eit bål.
– Bålet var ikkje forsvarleg sløkt. Det kunne fort ha vorte skogbrann, seier han til avisa.
Ut frå ei heilskapsvurdering valde brannvesenet å setja ut utkikspostar i området, skriv avisa.
