Skjenkjereglar for få liter
Nær 93 prosent av alkoholforbruket i Kvam skjer ikkje på ute- og serveringsstader. Korleis kan ein då nå målet om mindre drikking?
– Me er usikre på kva me kan gjera, sa Jostein Moldsvor (KrF) då formannskapet drøfta dei nye alkoholpolitiske retningslinene 15. mai.
Så nye er dei kanskje ikkje, for rådmannen vil jamt over og med berre små justeringar halda fram med dei gamle. Og det er nettopp det som ifylgje KrF kan vera problemet, ettersom nasjonale mål tilseier at alkoholforbruket innan neste år skal ned med ti prosent samanlikna med 2010. Statistikken kan tilseia status quo etter at 14 av 15 år har gått, meiner Moldsvor, som etterlyser respons frå dei andre partia når KrF påpeikar spriket mellom teori og praksis.
– Me får liksom ikkje nokon respons på kva me gjer for å nå målet, sa Moldsvor i formannskapsordskiftet.
Kalddusj med tal
KrF-optimismen vart nok ikkje større etter at leiar for eining for alkohol og servering, Nils Anders Bolstad, opplyste om at nær 93 prosent av alkoholforbruket i Kvam skjer andre stader enn på offentleg tilgjengelege skjenkjestader. Såleis har dei kommunale retningslinene for skjenking lite å seia for forbruket, påpeika han.
– Ein ynskjer mest mogeleg skjenking i kontrollerte former. Det vil seia at, motsett av det folk tenkjer, er det eit ynske at ein har mest mogeleg av alkoholbruken på regulerte plassar. Der har ein greie lover som regulerer forbruk, utanforskap og diskriminering. Strekkjer ein konklusjonen veldig langt, vil fleire skjenkjeplassar redusera forbruket. Det private forbruket er totalt uregulert, med unntak av alderskrav og prismekanismane, sa Bolstad.
Varaordførar Frode Nygård (Frp) meiner at skjenkjekontrollen gjer ein god jobb og har god kontroll, og at utfordringane ligg i den private sfæren.
– Me har lite eller ingen kontroll på dei 92 prosentane, sa Nygård.
Haytham Sarmadawy (H) meiner at politikarane bør arbeida for å redusera alkoholforbruk i heimen. Skjenkjeløyve sikrar servering i kontrollerte former, påpeika han. Moldsvor er ikkje usamd, men sveva framleis i villfaring med tanke på kva politikarane kan ta seg til for å redusera konsumet.
Han føreslo eitt tiltak: å avgrensa skjenking utandørs til midnatt i staden for 00.30. Tradisjonen i skjenkjesaker tru fall KrF-framlegget av di ingen andre støtta partiet.
Litt støy kring støy
Gry M. Kyrkjeeide (Frp) framheva eit nytt punkt i retningslinene som gjeld musikk utandørs. Det seier at reglane for musikkstøy utandørs og i telt «er samsvarande med» komande reglar i retningsliner for bruk av kommunalt uteareal til arrangement. Dei sistnemnde retningslinene vart tidlegare i år utsette. Samanblandinga av regelsetta forvirra fleire som undra kvifor ein blandar saman føringar for støy og skjenking.
Bolstad opplyste at det har vore utfordringar med musikkstøy utandørs, og at det er bakgrunnen for framlegget om å avgrensa skjenkjeløyve utandørs når det vert spela livemusikk.
Konkret er føringa retta mot større arrangement med livemusikk, til dømes Bygdalarm, trebåtfestivalen og bryggjedansar, understreka han.
– Det vil vera meiningslaust å gje skjenkjeløyve fram til klokka 02, mens ein skal be musikken slutta klokka 23, sa Bolstad.
Skal handsama eigne innspel
Berre to innspel kom då dei justerte retningslinene var på høyring. Til alt overmål kom det eine og mest omfattande frå eit politisk parti: INP.
Dette omtalar rådmannen slik i saksutgreiinga: «Det er eit eige tema at eit politisk parti med ein representant som sjølv skal handsama saka og gjera endeleg vedtak, kjem med innspel til ein plan. Det reiser spørsmål ved både forholdet mellom administrasjon og politikk, der administrasjonen skal ha ei partipolitisk nøytral sakshandsaming, og i høve habilitet i sjølve handsaminga.»
Rådmannen har teke problemstillinga opp med KS, og i møtet refererte ho ei tilbakemelding som tilseier at parti ikkje vert ugilde av å engasjera seg i ei sak før politisk handsaming. Varaordførar Frode Nygård (Frp) minte om at det prinsipielle spørsmålet er kva det medfører å engasjera seg før administrativ handsaming av ei sak.
– Om det er greitt, trur eg rådmannen kan førebu seg på vesentleg meir arbeid frå dei politiske partia, sa Nygård, som meiner det er skilnad på engasjement gjennom debattar og lesarinnlegg og å blanda seg direkte inn i den administrative handsaminga av saka.
Hesthamar såg poenget, og lova å ta saka opp med KS ein gong til.
Ordførar Torgeir Næss (Ap) påpeika at INP vert sitjande på båe sider av bordet i saka når retningslinene kjem opp i heradsstyret torsdag 23. mai.
– Om nokre byrjar senda inn, byrjar alle med det. Då vert det ganske omfattande, sa han.
