Skjenk i ny base

Det tilrådde løyvet gjeld alkohol i gruppe 1, 2 og 3 i kjellarsalen på 167 rutemeter. Driftskonseptet er restaurant, kafé og pub. Den tilrådde skjenkjetida er frå klokka 12 til 02 kvar dag. Skjenkjestyrar er Heidi Steinstø Helgheim og avløysar Katrine Helgheim van Tulder.

Søkjaren flytta verksemda frå Steinstø til Ålvik i vinter, og har hatt serverings- og skjenkjeløyve i 23 år. Planen er å yta tenester som matlaging, catering, mottak av bussreisande, matkurs, sidersmaking og kvisskveldar, og slik skapa aktivitet i Ålvik.

Rådmannen viser til at Folkets Hus ligg nær skulen, barnehagen og idrettsplassen, men påpeikar at skjenking på dagtid berre skal gå føre seg i samband med servering av mat, lukka tilskipingar og turistgrupper. Søkjaren planlegg ikkje å skjenkja i samband med idrettsarrangement for born og unge. Rådmannen meiner difor at søknaden ikkje er i konflikt med målet i alkoholpolitiske retningsliner om alkoholfrie soner der born og unge ferdast.

22. mars drøftar formannskapet saka. Heradsstyret får siste ord 28. mars.