Skisenter lyt førebels klara seg sjølv
Medan ei ny kommunal straumordning kan hjelpa eitt av skianlegga på Kvamskogen, fryktar eit anna å hamna i ein vanskeleg situasjon dersom dei høge straumprisane held fram.
Eikedalen Skisenter trur det kan verta vanskeleg å halda anlegget ope i vinter dersom straumprisane ikkje endrar seg og verksemda ikkje får økonomisk hjelp. Det går fram i eit skriv skisenteret sende til Samnanger kommune i oktober.
Medan konkurrenten i Furedalen kan søkja om kommunal stønad, tilrådde rådmannen i Samnanger i desember å avslå søknaden til skianlegget i Eikedalen.
I oktober sende Samnanger Næringsforum søknad til Samnanger kommune om tilskot til straumkostnader på vegner av Eikedalen Skisenter. I skrivet hevdar leiar Knut Bjørnås at det er avgrensa kor mykje av straumkostnadene som kan hentast inn med til dømes auka billettprisar. Han påpeikar at stenging av skianlegget kan få negative ringverknader for næringslivet i kommunen. Bjørnås viser mellom anna til at skisenteret har fleire fast tilsette, i tillegg til mange i deltidsstillingar om vinteren, som kan risikera å stå utan jobb, og at alpingruppa i Samnanger Idrettslag vil stå utan tilbod dersom anlegget vert stengt.
– Viktig for kommunen
8. desember vart saka drøfta i kommunestyret i Samnanger. Karl Bård Kollbotn (Frp) påpeika at Eikedalen Skisenter er viktig for kommunen.
– Mange nyttar anlegget både på dagtid, i skuletida og på kveldstid. Skisenteret kan brukast som ein idrettshall. Betre trening enn dette får du faktisk ikkje, sa han.
Kollbotn føreslo at kommunestyret skal vurdera den økonomiske situasjonen etter sesongen er ferdig. Rådmann Ove Sæbø meiner på si side at risikoen for presedensverknad talar mot å gje stønad til berre éin aktør utan å ha kriterium å gå etter.
Enden på visa i Samnanger vart at rådmannen fekk i oppdrag å leggja fram eit forslag om ei ordning for straumstønad til næringslivet.
Konkurrentar får hjelp
Medan skianlegget i Eikedalen ser ut til å måtta klara seg på eiga hand, kan konkurrenten i Furedalen, Furedalen Alpin, truleg få økonomisk hjelp. Heradsstyret vedtok at skitrekk kan søkja om straumstønad i vinter dersom snittprisen er over éi krone per kilowattime.
Også konkurrentane i Ullensvang får hjelp. Røldal Skisenter har både fått direkte stønad og har høve til å inngå fastprisavtale med ein pris på éi krone per kilowattime.
