Skiltar til næringsområde

To nye skilt i kvar køyreretning vil visa veg frå fylkesveg 49 til Sandvenhagen næringsområde og gjenvinningsstasjonen til Bir AS.

Det kjem fram i ein ny skiltplan som avdeling for infrastruktur og veg i Vestland fylkeskommune har bede Statens vegvesen om å vedta.

Kvam herad har sendt innspel om skilting til gjenvinningsstasjonen av di ukjende har hatt problem med å finna fram til han. Heradet vil supplera med skilt på kommunale vegar, skriv fylket.

Skilta vil verta trekte noko vekk frå siktsona og heva, slik at dei ikkje vert til hinder for sikta, lovar fylkeskommunen.