Skil ikkje mellom bassenga
Elin Eide Brattabø (H) ynskte ulike prisar for å bada i basseng med ulike tilbod og opningstider, men framlegget drukna i eit stort fleirtal.
Brattabø vil ikkje røra dei føreslegne prisane for enkeltbillettar. Derimot meiner ho at det er urimeleg at ullensvangarane skal betala like mykje for eit sesongkort i eit basseng som er ope éin dag som i eit som er ope mange dagar i veka. Ho viste til at mange ikkje kjem seg frå eit anlegg til eit anna i kvardagen.
Difor bør prisane differensierast og kvart sesongkort gjelda for berre eitt anlegg, forfekta H fånyttes då kommunestyret drøfta badetilbodet 21. desember.
Frå bygd til by
Motargumentet, som Lajla-Margrethe Lindskog-Lund (Sp) snøgt påpeika, er at med den nye ordninga med eitt sesongkort for alle basseng kan alle bada kvar dei vil utan å tenkja på ekstra kostnader. Dimed kan ho ta med seg borna i Odda Folkebad når familien er i Odda, utan å betala meir enn ho uansett gjer for sesongkortet i Jondal.
– Ei strålande sak. Symjing er ei ferdigheit du kan døy av ikkje å kunna, sa ho.
– Dette er ein gåvepakke til innbyggjarane. Me ynskjer at flest mogeleg skal bruka bassenga og få betre symjedugleik, og at alle bassenga skal vera tilgjengelege for alle. Difor skal prisen vera lik, sa teknisk sjef Randi Karin Habbestad.
Vidar Solvi (Ap) meiner saka er ei etterlengta anerkjenning av kor viktig badetilbodet er. Han har sans for eit sams tilbod overalt, og meiner det ikkje vil vera noko stort problem for borna å bada både i eiga bygd og andre stader.
H føreslo elles at barnebilletten skal gjelda til og med ein fyller 18 år, og å lata sesongkorta gjelda for eit skuleår i staden for eit kalenderår. Ingen andre parti støtta framlegga, men fleire problematiserte bruken av nemninga «sesongkort».
Lokal reklame
Brattabø understreka at det er feil at bassenga etter pandemien vert drivne berre i kommunal regi, slik rådmannen skriv i sakspapira. Jondal Idrettslag driv framleis både folkebading og opplæring i jondalsbassenget, påpeika ho.
Lindskog-Lund nytta høvet til å minna om at jondølingane allereie har det oddingar ynskjer seg, nemleg eit plaskebasseng for born med varmare vatn.
– Dei som saknar det, kan koma til Jondal, og med eit sesongkort er ikkje det noko problem, sa ho.
– Det skal eg tipsa småbarnsforeldre om, for det visste ikkje eg om, sa Solvi.
