Skiheis mellom borken og veden

Årsaka til at staten ikkje kan støtta drifta, er at «Mødalstrekket» eller «Bondetrekket» er drive på dugnad. Søkjaren har difor bede om 50.000 kroner frå kraftfondet som kompensasjon for tap som følgje av koronaviruset sist vinter.

Utfordringa er at dei statlege føringane ikkje opnar for å støtta rein drift. Kari Mostad (MDG) er kritisk til at ikkje fleirtalet ynskjer å trassa staten og løyva tilskotet, og føreslo i formannskapsmøtet 28. oktober å løyva pengane.

Etter det møtet sende rådmannen fylkeskommunen spørsmål om kva ein kan dekkja. Spørsmålet vart sendt vidare til departementet. Tilbakemeldinga var at det ikkje er opning for å dekkja bortfall av inntekter, opplyste leiar for samfunn, kultur og næring, Jon Nedkvitne, i heradsstyremøtet 3. november.

Oppmodar om ulydnad

Kari Mostad (MDG) hevda at andre kommunar har tolka reglane annleis, og synest det er at pussig at kvemmingane ikkje vil bruka av ekstramidlane som er tilførte næringsfondet til å kompensera for koronatap. Ho opplyste at også ho har rådført seg med fylkeskommunen, som skal ha uttrykt at det ikkje er aktuelt å trekkja tilbake løyvingane.

Bjørgulv Hauger (Frp) påpeika at anlegget er drive på dugnad og difor ikkje kan få stønad frå statlege ordningar. Han spurde om anlegget kanskje kan få stønad frå potten som er sett av til kompensasjon for tapa inntekter i lag og organisasjonar.

Nedkvitne opplyste at det har kome 14 søknader etter at pengane vart lyste ut på nytt, og at dei kjempar om dei 219.000 kronene som står att av totalpotten på 600.000 kroner frå havbruksfondet.

– Eg skulle ynskja det var mogeleg å gje pengane med bruk av skjøn. Då må det vera heimel for bruk av skjøn i regelverket. Etter mitt syn er det ikkje mogeleg å bruka skjøn, sa ordførar Torgeir Næss (Ap).

Framlegget frå Mostad om å løyva pengane fall mot to røyster.

Banka gjennom det meste

Ei lang rekkje søknader om stønad frå kraftfondet vart avgjorde av heradsstyret. Nokre få saker vart utsette. Slik vart utfallet av sakene:

• Hagen på Nes får 50.000 kroner til grønsakproduksjon etter marknadshageprinsippet. Vedtaket var samrøystes.

• Hardanger Bryggeri får 200.000 kroner til etablering og marknadsarbeid. Halvard Lilletveit (Ap) var ugild i saka av di han sit i styret i og har aksjar i søkjarselskapet. Gjermund Stuve har aksjar i Mathuset i Hardanger AS, som skal leiga ut lokale til søkjaren, men fekk delta i debatten. Rådmannen la vekt på at det ikkje er Stuve sjølv som skal leiga ut lokala, og at andre truleg vil ha interesse av å leiga dei dersom Hardanger Bryggeri ikkje skal gjera det. Vedtaket var samrøystes.

• Hardanger Fotterapi får 50.000 kroner til utviklingsarbeid og etablering. Vedtaket var samrøystes.

• Helse i Hardanger AS får inntil 75.000 kroner til kjøp av elektriske syklar. Vedtaket var samrøystes.

• Kvam Fjellheisar AS får 300.000 kroner til oppgradering av skitrekket i Furedalen. Vedtaket var samrøystes. Frode Skeie (H) var ugild i sak av di han har ein bror og to nevøar som er eigarar i selskapet. Særleg interessene til broren vart vektlagde av rådmannen, som tilrådde at Skeie var ugild. Frode Nygård (Frp) har ein bror som er driftsleiar i søkjarselskapet, men fekk delta i ordskiftet.

• Mikrobiorens AS får inntil 100.000 kroner til utviklingsarbeid og testproduksjon, på vilkår av at Innovasjon Noreg støttar prosjektet. Eit framlegg frå Kari Mostad (MDG) om å auka tilskotet til 200.000 kroner fekk sju røyster og fall.

• Næringshagen i Hardanger AS fekk avslag på søknaden om 700.000 kroner til prosjektet Det digitale Kvam, fordi prosjektet må forankrast betre i målgruppa. Vedtaket var samrøystes. Gjermund Stuve (Sp) var ugild i saka av di han er styreleiar i selskapet.

• Næringshagen i Hardanger AS får 270.000 kroner til arbeidet med gründerkurs i 2020. Tilskotet vert redusert om kurset har færre enn 12 deltakarar. Pengane vert ikkje utbetala før søkjaren har levert sluttrapport om førre kurs som vart støtta av kraftfondet. Vedtaket var samrøystes, bortsett frå det sistnemnde kravet, som vart vedteke mot to røyster. Bjørgulv Hauger (Frp) ville vita kva det kostar å delta på kurset, men rådmannen kunne ikkje svara på det. Hauger føreset difor at kurset er gratis, ettersom kostnadsplanen ikkje inneheld deltakaravgifter. Gjermund Stuve (Sp), styreleiar i søkjaren, var ugild i saka. Vigdis J. Håland (Ap) fekk delta i ordskiftet, sjølv om dottera hennar skal delta på gründerkurset.

• Handsaminga av søknaden om stønad til skatepark i Ålvik vart samrøystes utsett.

• Kvamskogen Vel fekk avslag på søknaden om stønad til arbeidet med ei jubileumsbok.

• Hardangerbadet AS får 150.000 kroner til marknadsføringstiltak, på vilkår av at selskapet sender heradet ein detaljert plan for tiltaka før dei vert sette i gang. Heradsstyret ber søkjaren om å søkja samarbeid med andre aktørar for å nå breiast mogeleg ut med tiltaka, før planen vert presentert for Kvam herad. Vedtaket var samrøystes. Gjermund Stuve (Sp) er styreleiar i Øystese Næringslag, som har aksjar i søkjaren, men fekk delta i ordskiftet.

• Kunsthuset Messen får 100.000 kroner til etablering av kunstpark i uteområdet ved Messen i Ålvik. Vedtaket var samrøystes. Geir Madsen (SV) fekk ikkje delta i debatten av di kona er involvert i prosjektet.

• Kvam Maskin og Transport AS får inntil 300.000 kroner til etablering av Jordmiljøvest AS, på vilkår av at også Innovasjon Noreg støttar initiativet i tråd med budsjettet, og at etableringa av verksemda skjer i Kvam. Vedtaket var samrøystes.

• Mambo Partners AS får inntil 50.000 kroner til etablering, produktutvikling og marknadsføring av Øvreviken pizzeria.

• Mitoboosting Supplements får 110.000 kroner til testproduksjon av frysetørka kosttilskot basert på storfelever.

• Handsaminga av søknaden frå Norheimsund Hamneutvikling om 15.000 kroner til ein studietur for å sjå på eit flytande basseng i Arendal og skriva rapport om turen, vart samrøystes utsett. Årsaka var at Geir Madsen (SV) kom med nye opplysingar om at søkjaren berre vil studera badstove med garderobeanlegg, ikkje basseng. Madsen har sjølv ein part i selskapet, men fekk delta i ordskiftet.

• Handsaming av søknaden frå Norwegian Fine Food and Spirits AS om 50.000 kroner vart samrøystes utsett av di det vart stilt spørsmål administrasjonen ikkje kunne svara på.