Skeptisk til «skylift»
– Gondolbaneprosjektet Hardanger Lift AS vil ha irreversible skadeverknader på naturen.
Det skriv Arjen L.H. Stolk i Herand i ein merknad til Ullensvang kommune om detaljreguleringsplanen for gondolbanen frå Odda til Rossnos. Han er «i høgaste grad» bekymra for alle konsekvensane av prosjektet.
Stolk framhevar trafikkauken, som dagens vegnett etter hans syn i liten grad er tilrettelagt for, og viser til tidlegare liknande prosjekt der talet på arbeidsplassar vart monaleg mindre enn spådd.
Generelt sett er dei positive, tenkte resultata av slike prosjekt til vanleg ein god del mindre i praksis, skriv Stolk. Han konkluderer med at tiltaket ikkje bør gjennomførast, og i alle fall ikkje med offentlege kroner.
Han har òg kome med ein kommentar på vegner av verksemda Arjen L.H. Stolk's Tre Tradisjon Herand. Som næringsdrivande, delvis i turistbransjen, ser han moglegheitene for litt auka belegg ved overnatting på grunn av gondolprosjektet. Men han reknar med at dei negative konsekvensane av prosjektet vil vera større enn føremonene, og er såleis skeptisk til banen også som næringsdrivande.
