— Skattelette sementerer sosiale skilnader
MDG meiner redusert eigedomsskatt er ein dårleg måte å kompensera kvemmingane for høge straumrekningar på.
Fleirtalskonstellasjonen — Ap, KrF, H og Frp — har føreslege både å redusera skattesatsen frå 3,2 til 3 promille for godt og å gje eit botnfrådrag på 200.000 kroner berre i 2022.
Kuttet i satsen er «ordinær politikk» og eit mål som er nemnt i samarbeidsplattforma til fleirtalskonstellasjonen i Kvam. Frådraget, som gjeld bustader og fritidsbustader, er derimot meint som ein kompensasjon for høge straumprisar.
— Skivebom
MDG meiner det er positivt å gje folk noko att for at kommunane tener godt på høge kraftprisar, men at oppskrifta er feil.
Heradsstyrelem Natalia Golis påpeikar at den føreslegne skatteletten vil koma berre dei med fast eigedom til gode. Det er ein skivebom dersom ein ynskjer å nå dei som treng hjelp, og tiltaket vil sementera dei sosiale skilnadene, meiner ho.
Golis viser til at mange hundre i Kvam bur i leigd bustad. Dei får ikkje hjelp til å betala straumrekninga så lenge dei ikkje kvalifiserer for stønad frå Nav.
— Dårlege alternativ
— Om 85 prosent treffer i skiva, er det ikkje skivebom, kommenterer ordførar Torgeir Næss (Ap) når HF fortel han om kritikken frå MDG.
Han viser til at tal frå Statistisk sentralbyrå tilseier at om lag 85 prosent av innbyggjarane i Kvam bur i ein bustad dei eig sjølve. Dessutan får eit ukjent tal leigetakarar straumkostnaden dekt av huseigaren, påpeikar Næss.
Næss seier fleirtalskonstellasjonen er merksam på at skatteletten ikkje vil nå alle, men meiner det ikkje er ille om ein treffer 85 prosent av målgruppa. Alternativet, slik han ser det, er å laga til ordningar som vil krevja mykje administrativt arbeid.
Ein kunne eventuelt ha sendt pengar direkte til alle innbyggjarane, men ikkje alle ynskjer stønaden, påpeikar ordføraren. Han minner om at dei som har aller minst og treng økonomisk hjelp, vil få det i form det sosiale tryggleiksnettet gjennom til dømes bustønaden.
Golis meiner fleirtalet i staden for å gje skattelette bør støtta framlegg frå MDG om å investera i energiøkonomiserande tiltak, for å verta betre rusta for ei framtid med høge straumprisar. Heller enn leiarskap utøver fleirtalet symptomlindring, meiner ho.
Budsjettet og økonomiplanen vert handsama av heradsstyret i eit digitalt møte torsdag.
