Skarpen-planen påskundar kommunale kostnader
Forhandlingane om næringsområdet Skarpen er over. No ligg eit avtaleutkast klart. Om politikarane godkjenner det, kan reguleringsplanen ferdigstillast og godkjennast.
Nesten to månader etter at handsaminga av Skarpen-planen vart utsett, er Kvam herad og GBS Entreprenør AS klare med ein intensjonsavtale for området Skarpen. Frå før har selskapet ein intensjonsavtale med grunneigar Torkel Hovland om kjøp av grunnen på vilkår av at planen vert godkjend.
Avtalen føreset godkjenning i heradsstyret, og vert fyrst bindande etter at avtalen og reguleringsplanen er endeleg godkjende i heradsstyret. Totalramma i intensjonsavtalen er på 11,1 millionar kroner pluss moms. Heradsstyret tek opp saka 20. juni.
Ville avklara VA
Då reguleringsplanen låg klar til vedtak i mars, vart prosessen sett på vent på oppmoding frå rådmannen i siste liten. Årsaka var at tingingane med GBS Entreprenør enno ikkje hadde ført til nokon avtale om fordeling av kostnadene med planen, som Kvam herad har lagt ut for.
– Å forhandla på vegner av ein kommune kan vera utfordrande når me ofte må visa meir av våre forhandlingsposisjonar enn andre, sa rådmann Anita Hesthamar då ho orienterte heradsstyret om saka.
No held ho ikkje korta like tett til bringa. Ifylgje sakspapira til komande heradsstyremøte vart det før handsaminga av reguleringsplanen stilt spørsmål om trongen for infrastruktur for næringsområdet. Det måtte sikrast ei tilstrekkeleg vass- og avløpsløysing, og rådmannen ville ha henne avklara før reguleringsplanen vart teken opp til godkjenning.
Tek høgd for utbygging
Vasstrykket til abonnentar i Bergshagen er tidvis dårleg, skriv rådmannen. Tilknyting av nye, større abonnentar vil medføra ytterlegare reduksjon i vasstrykket. Om industriområdet skal etablerast på Skarpen, må planane om å leggja vassleidning frå høgdebassenget på Torpe til Laupsa framskundast. Det er del av avtalen.
Kostnaden med prosjektet er grovt rekna til 10,42 millionar kroner utan moms, medrekna interne kostnader og ein tryggleiksmargin på 15 prosent.
GBS Entreprenør skal etablera vass- og avløpsleidningar frå industrifeltet til Laupsa. Der leidningane møtest, skal selskapet montera ein vasskum levert av Kvam herad. GBS Entreprenør får 600.000 kroner av Kvam herad for å etablera vassleidningen frå Laupsa til samankoplingspunktet. Etter ferdigstilling vert leidningane kommunale, ifylgje avtaleutkastet.
Den tekniske løysinga skal ifylgje avtalen detaljprosjekterast og ta høgd for framtidig utbygging på Laupsa.
– Sjølvkost likevel
Sjølv om prosjektet med vassleidning vert aktualisert gjennom etableringa av industriområdet, meiner rådmannen at det kjem inn under sjølvkostområdet for vatn og avløp og såleis kan dekkjast med gebyr frå abonnentane.
Rådmannen meiner at industriområdet bør sjåast i samanheng med det kommunale prosjektet om å etablera avløpsleidning i sjø frå Laupsa til Notanes. Leidningen vil sikra god avløpshandtering for industriområdet, meiner ho.
I avtalen står det at entreprenøren i samband med arbeidet må sørgja for overføringsleidningar frå industriområdet til avløpsnettet og sjøleidningen. Desse leidningane meiner rådmannen bør verta kommunale.
Tok opp kostnadene
Seinast i eit formannskapsmøte i november stilte Ottar Randa (H) spørsmål om kostnadene med reguleringsplanen. Han var oppteken av om Kvam herad hadde sikra seg å få att kostnadene, slik at ikkje private aktørar får glede av store inntekter utan å måtta gjera opp for seg.
Partane har vorte einige om at GBS Entreprenør i fyrste omgang skal betala 805.000 kroner pluss moms for arbeidet. Kostnaden dekkjer dei eksterne kostnadene kommunen har hatt med arbeidet utført av konsulent ABO Plan & Arkitektur AS. Ifylgje Jon Nedkvitne, leiar for samfunn, næring og kultur i Kvam herad, har ikkje heradet oversikt over dei interne kostnadene.
Dersom framlegget vert vedteke, tek GBS Entreprenør dessutan ansvar for alle kostnader med «vidare utvikling og utbygging av området», og er dessutan ansvarleg for utbygging og tilkopling av vatn og avløp. Ifylgje Nedkvitne må den private aktøren mellom anna betala for både utførte og framtidige kulturminnegranskingar – kort sagt alt grunnlagsarbeid som må til for å få planen vedteken.
Glad for initiativet
Han påpeikar at dersom ikkje GBS Entrepenør hadde teke hand om området, måtte Kvam herad ha løyst ut grunneigaren og dekt granskinga.
– Me er glade for at nokon tek ansvar. Målet er å ha næringsareal på hand og tilgjengeleg, og at det skal verta mindre trykk i sentrale strok, seier Nedkvitne.
Reguleringsplanen opnar for kai i Oddesvik. Eit punkt i avtalen seier at det er ynskeleg at denne vert utbygt til bruk for andre enn utbyggjaren. «Ved planar om å opparbeida kai skal partane ha ein dialog», heiter det. Ifylgje Nedkvitne vil kostnader vera eit naturleg tema, utan at punktet forpliktar Kvam herad på nokon måte.
Ifylgje Nedkvitne er ikkje Kvam herad informert om innhaldet eller kjøpesummen i avtalen mellom grunneigaren og GBS Entreprenør.
