Skal vurdera om golvet toler den nye brannbilen
H2 Hardanger skal undersøkja om dekket ved Oma brannstasjon toler vekta av den nye brannbilen.
I fyrste del av 2025 skal Oma brannstasjon få ny brannbil. Den nye bilen veg 26 tonn – 14 fleire tonn enn den gamle. Arne Johan Heggland, prosjekt og byggjeleiar i Kvam herad, spør i ein e-post til H2 Hardanger AS om selskapet kan vurdera kvaliteten på dekket i brannstasjonen.
– H2 Hardanger skal kontrollera at golvet i brannstasjonen toler den nye brannbilen. Me trur alt er i orden, men det skal kvalitetssikrast at det er sterkt nok, sidan dette er eit gamalt bygg, seier Heggland.
Heggland skriv i e-posten at dekket skal vera oppført kring 1966, og at det ikkje finst detaljteikningar av konstruksjonen. Han skriv at det er skissert korleis situasjonen er i dag. Håkon Hjartnes, gruppeleiar for prosjektering i H2 Hardanger, svara at selskapet må ha synfaring i bygget. Ifylgje Heggland fann synfaringa stad sist torsdag. Konklusjonen var før helga ikkje klar.
