Skal vurdera om båten er forsøpling
Grunneigar Kjetil Linga på Linga har fått varsel om at Bir skal koma på synfaring.
I eit brev frå Bir Husholdning AS vert Linga varsla om at selskapet planlegg synfaring 25. september. Brevet er sendt fordi Bir har fått informasjon om fare for ureining eller forsøpling på eigedomen hans. Ifylgje brevet gjeld saka eit båtvrak med oppriven presenning rundt. Båten står på eit jorde like ved fylkesveg 576 på Linga, og der har han stått lenge.
Ureiningslova gjev kommunane ansvar for å føra tilsyn med avfallshandtering. Kvam herad har delegert oppgåva til Bir, som skal kontrollera om båten utgjer eit brot på plikta til å unngå ureining eller på forbodet mot forsøpling.
Linga vert oppmoda om å vera til stades under synfaringa. HF har vore i kontakt med grunneigaren, som fortel at han ikkje eig båten, men at han har snakka med eigaren etter han fekk brevet. Ifylgje Linga har vedkomande lova å fjerna båten med det fyrste.
