Skal tilsetja fire montørar

Pengane skal gå til to og etter kvart fire arbeidsstasjonar der arbeidarar skal montera matstovestolar baserte på delar frå Kina. Montering, trekking og pakking skal gjerast i Øystese. Ein lokal møbeltapetserar har teke på seg å læra opp dei nye medarbeidarane. Verksemda ser prosjektet som viktig fordi det vil gje auka konkurranseevne og medføra monaleg lokal verdiskaping.

Torpe Møbelfabrikk har utsal i Øystese og på Husnes. Målgrupper for prosjektet er primært dei frittståande møbelbutikkane i Noreg, og ein arbeider for å få innpass i Møbelringen. Det vert òg lagt opp til eksport til den skandinaviske marknaden og til Be-Ne-Lux-landa. Dei fyrste tingingane er alt mottekne etter presentasjon for og kontakt med utvalde agentar i Danmark og Belgia.

Det er hard konkurranse i møbelbransjen, og kjededominansen er sterk. Kjedemakta vil auka, trur verksemda. For at møbelfabrikken skal overleva, er det avgjerande at ho lanserer produkt som er så unike at ein kan få innpass i ei eller fleire kjeder. Den skandinaviske marknaden er interessant, og tilbakemeldingar gjev grunn til nøktern optimisme og moglegheiter for sal av dei nye stolane, heiter det i søknaden.

Sjølv om produksjonen vart fasa ut og lagd til Aust-Europa og Kina for nokre år sidan, har Torpe Møbelfabrikk halde fram med produktutvikling i eigen regi. Møbelfagleg tilsette utfører framleis arbeid lokalt. Resultata i pandemiåra 2020 og 2021 var svært positive. 2022 gav eit resultat i balanse, og målet for 2023 er det same. Verksemda har god kontakt med Innovasjon Noreg og har fått stønad på 500.000 kroner til å utvikla den nye serien med stolar.

Budsjettet er på om lag 2,6 millionar kroner over to år, vert det opplyst i søknaden.