Skal stella i næringshagen
Sigmund Vereide vert ny dagleg leiar i Hardanger og Voss Næringshage.
Det opplyser styreleiar Terje Breivik i ei pressemelding.
– Eg vil utnytta potensialet me har fått, seier Vereide.
Han har sidan fusjoneringa mellom dei to næringshagane vore nestleiar. Då Michael Knüsel fekk eit jobbtilbod hjå tekstilverksemda Dale of Norway i Vaksdal, vart leiarjobben ledig. Vereide var ein av åtte søkjarar. Vereide var også leiar av Næringshagen i Hardanger før fusjonen.
Vereide er oppteken av å koordinera innsatsen retta mot bedriftene best mogleg. Kontorstad skal framleis vera Øystese, men Vereide får litt fleire turar til Voss enn han er van med. Han håpar òg han får besøkt verksemdene i regionen.
Hardanger og Voss Næringshage er den største av sitt slag i Noreg. Verksemda har ansvar for Voss, hardangerkommunane og Kvinnherad. Vereide har òg tru på prosjekta med regional utdanning som næringshagen driv med.
– Me må ikkje lata kommunegrensene setja grenser, seier gløpparen.
