Skal sprøyta med drone mot ugras

Oppdragsgjevar er AT Skog SA.

Ved sprøyting frå drone får ein bort vegetasjon som er til hinder for arbeidet med planting og hogst. Firmaet Biodrone AS frå Steinkjer vert nytta til å utføra oppdraget.

Sprøytinga i Kvam vert også ein test som kan visa om framgangsmåten kan vera aktuell i anna bratt terreng på Vestlandet. Det er gjort slike forsøk på Møre og i Trøndelag, med gode erfaringar.

Kvam herad har sendt på høyring ein søknad om å få bruka mellom seks og ni liter ferdigblanda Roundup per dekar.

Mange utfordringar

Områda det er snakk om, er tidlegare plantefelt med gran som vart hogde og planta for ein del år sidan. Området må ifylgje søknaden plantast på nytt, då nær hundre prosent av plantane har gått ut av ulike årsaker.

Vindsviing — at trea turkar ut i sola og austavinden om vinteren fordi dei reagerer før bakken er fri for tele —, fører til stor avgang. Det gjer også gransnutebille, hjort og konkurrerande vegetasjon. Det er mange store steinar — blokkmark — i delar av området. Det er i tillegg svært bratt og vanskeleg terreng i området, slik at manuelt arbeid i felta vert særs arbeidskrevjande og risikofylt, heiter det i søknaden.

Tevlar om plassen

Bruk av drone er tryggare enn bruk av ryggtåkesprøyte for dei som skal utføra sprøytinga. Dronen sprøyter svært jamt, og ein oppnår å bruka mindre plantevernmiddel totalt. Ein drone er dessutan meir skånsam og gjev betre kontroll enn bruk av helikopter, som tidlegare vart nytta i slikt areal. Han er dessutan billegare.

Skadegjerarane som skal nedkjempast i Ytre Ålvik, er bringebær, geitrams, raudhyll og diverse lauvtre. Nokre område har mindre til liten konkurranse. Her veks det nokre granplanter frå før, og sprøyting er dermed ikkje høgaktuelt.

Det vert lagt inn ei buffersone til vasskjelder og bekker. Miljøverdiane vert tekne omsyn til, i tråd med krava i skogstandardane og lovverket.

Grunneigarane vert kontakta i god tid og må godkjenna tiltaket, skriv rådmannen.