– Skal snakka om kraft, krig og klasseskilje
Sofie Marhaug er stortingsrepresentant for Raudt Hordaland og 2. nestleiar i energi- og miljøkomiteen. Onsdag er ho 1. mai-talar i Ålvik.
Det opplyser Sverre Linga i Aalvik Arbeiderforening.
Marhaug fortel på telefon frå Vandrehallen på Stortinget at kraftpolitikk vert eit viktig tema i talen.
– Ålvik er heilt avhengige av rimeleg, fornybar kraft. Difor kjem eg til å snakka om kor viktig det er at politikarane tek kontrollen over kraftprisen og eksporten av kraft. Dette er naudsynt om me skal ta vare på industrisamfunna, seier ho.
Internasjonal solidaritet vert eit anna tema.
– 1. mai er den internasjonale kampdagen for arbeidarklassen. Eg kjem til å snakka om solidaritet med Ukraina, og om kor viktig det er å stoppa angrepa i Gaza. Noreg kan og bør gjera meir for å få slutt på krigen Israel fører mot sivile palestinarar, seier ho.
Marhaug planlegg dessutan å ta med nokre ord om klasseskilje, fellesskap og solidaritet.
– Skilnadene aukar i Noreg. Samstundes snakkar me meir om rikingar som flyttar til Sveits enn om nordmenn som står i matkø. Det siste er eit aukande problem. Velferdsstaten må byggjast ut og ikkje ned. Me treng meir omfordeling og meir fellesskap, seier ho.
– Kva er ditt forhold til Ålvik?
– Eg har ikkje eit nært forhold til Ålvik. Eg veit at det er ei vakker industribygd. Som bergensar har eg vore gjennom Ålvik nokre gonger i forbifarten. Eg gler meg til å koma attende, seier ho.
