Skal renovera kjøken
Fuglafjell AS har fått oppdraget med å totalrenovera kjøkenet på Voss sjukehus.
Det skriv verksemda på Facebook. Dagleg leiar Arne Lunestad fortel at i tillegg til å renovera kjøkenet, skal Fuglafjell byggja eit lite tilbygg som skal husa eit nytt ventilasjonsanlegg. Byggherre for både kjøken og tilbygg er Helse Bergen HF.
Oppdraget har ein verdi på om lag ti millionar kroner.
– Det er ikkje blant dei største oppdraga, men er likevel viktig. Det syner at Fuglafjell kan hevda seg i konkurransen om både store og litt mindre oppdrag med offentlege byggherrar, seier han.
Arbeidet byrjar truleg i august. Målet er at kjøken og tilbygg skal leverast rundt nyttår.
Det er ikkje det første oppdraget Fuglafjell har fått i år. Verksemda skal byggja både omsorgsbustader i Rosendal og brannstasjon på Voss.
– Det har vorte lyst ut nokre offentlege oppdrag i vårt marknadsområde i det siste. Me har vore heldige og fått fleire tilslag, fortel Lunestad.
– Har de kapasitet til alt dette?
– Fuglafjell er samansett av tre firma, og me har med oss mange underentreprenørar. Det gjev oss ein fleksibel organisasjon som toler periodar med få oppdrag og periodar med ein stor ordrereserve, seier han.
