Skal plukka bos langs fjorden
Torsdag skal det ryddast plast i Kvam igjen.
Då er det nok ein gong klart for ryddedugnaden Rein Hardangerfjord. Målet er å rydda vekk så mykje marin forsøpling som mogeleg på éin dag. Rein Hardangerfjord er eit femårig prosjekt som går ut på å rydda fjorden for all plast.
Ryddehjelparane vel sjølve kva område dei ynskjer å rydda. Aksjonen er ein del av strandryddeveka i regi av Hold Norge Rent. Kvam herad oppmodar difor kvemmingar om å rydda heile veka.
Heidi E. Ørjansen, leiar for eining for plan og byggjesak og for tida i tillegg konstituert samfunns- og utviklingssjef i Kvam herad, seier at det er registrert tre ulike ryddeaksjonar i området. Om lag tjue personar skal rydda på Kvamsøy. Sjømat Norge står ansvarleg for den aksjonen. Elevar ved Kvam ungdomsskule skal rydda langs fjorden i Øystese. Strandebarm grendeutval står bak ein aksjon der det vert rydda heile veka.
– Totalt i heile fjorden var det meldt inn 21 aksjonar for eit par dagar sidan. Av erfaring vert mange av aksjonane registrerte same dag eller etterpå, så det vert nok fleire, seier Helene Sandsten, dagleg leiar i Framtidshavet og prosjektleiar for Rein Hardangerfjord.
Fleire lag i grendene har sagt dei vil rydda i nærområdet denne veka, opplyser Ørjansen. I tillegg vil 15–20 dykkarar vera på plass for å henta bos frå fjorden i Norheimsund og Øystese, seier ho.
Rolla til Kvam herad er å hjelpa til med å dela ut utstyr som hanskar og sekkar, og samla inn og kasta boset.
