Skal møtast til våren
Dei ikkje-økonomiske fylgjene av å flytta turistinformasjonskontoret i Steinsdalen vart korkje vurderte eller drøfta med Statens vegvesen.
Det grøne bygget med kontoret og toalett vart opna med brask og bram i 2014, som eit såkalla turistvegprosjekt. Kvam herad forplikta seg den gongen til å driva turistinformasjonen der i minst ti år, opplyser rådmann Anita Hesthamar.
Ifylgje henne hadde ikkje turistvegseksjonen høve til å delta i eit møte om saka i haust, men det er avtala eit møte 29. april.
Før den tid vil det vera klart om framlegget frå rådmannen om å flytta kontoret til nye Kvam vidaregåande skule frå og med 2026 vert noko av. Politisk ser det ikkje slik ut; både fleirtalet og opposisjonsparti føreslo i formannskapet å droppa innsparinga på 248.000 kroner i året.
HF har spurt rådmannen korleis fylgjene av flytting er vurderte av administrasjonen. Det står det ingenting om i budsjettframlegget. Hesthamar opplyser at bakgrunnen for framlegget er berre økonomi.
Nokre var kritiske då kontoret vart flytta frå sentrum til fossen i 2014, sidan sentrum vart utan eit slikt tilbod. Men i fjor var om lag 22.000 innom kontoret, påpeikar ho.
– Det er mogleg at me ikkje klarar å få same besøkstal i sentrum, men det kan òg verta meir. Om politikarane ville gått vidare med framlegget, måtte tilbodet og bruken av bygget ved fossen vorte drøfta med Nasjonal Turistveg, og fylkeskommunen måtte også verta involvert i drøftingane om eventuell logistikk og bruk av det nye skulebygget, skriv rådmannen til HF.
