Skal investera 300 millionar kroner ein gong til

Pristildelinga hende i samband med årsmøtet til Kvam Næringsråd på Steinstø Fruktgard torsdag 31. mars. Det opplyser dagleg leiar i næringsrådet, Hans Jørgen Andersen i ei pressemelding.

Dagleg leiar i Hardingsmolt, Jakob Drivenes, tok imot eit diplom og eit grafisk arbeid av Jarle Rosseland som synlege prov på utmerkinga. Styreleiar i næringsrådet, Tone Søgaard, stod for overrekkinga.

— Ei sterk verksemd

Søgaard seier at utnemninga i år går til ei verksemd som er sterk på mange område. Det er eit framtidsretta selskap som har sett seg djerve mål og bryt ny grunn.

— Me er nok ikkje dei som fortel høgast om kva me driv med, men me er stolte over det me har fått til i Tørvikbygd, og me ynskjer å lyfta verksemda vidare. Det handlar om å byggja kompetanse og organisasjon og å løysa utfordringar saman, seier Drivenes i meldinga.

Hardingsmolt og Lingalaks AS er dei to verksemdene i Kvam som er med på den omfattande kartlegginga Grøn region Vestland. Kartlegginga, som er gjord av Vestland fylkeskommune, dreiar seg om framtidsretta næringsaktivitet.

Hardingsmolt har eit klekkjeri og eit oppdrettsanlegg for smolt. Heile anlegget har kring 30 kar fordelte på ei handfull hallar. Tradisjonelt har smoltanlegga produsert smolt i ferskvatn for utsetjing i merdar i sjøen når fisken er om lag 100—150 gram. Hardingsmolt har også eit saltvassanlegg — eit såkalla postsmoltanlegg. Her kan fisken verta opp til 400—500 gram før han vert sett ut i merd i sjøen, ifylgje pressemeldinga.

Hardingsmolt fekk i 2021 løyve til å meir enn dobla produksjonen av smolt i Tørvikbygd frå 2.200 tonn til 4.600 tonn årleg. Det betyr fem millionar individ kvart år med ei snittvekt på éin kilo, ifylgje ilaks.no.

Resirkulerer vatn

Oppdrettsverksemda var ein av pionerane i Noreg med å resirkulera ferskvatn i produksjonen — såkalla RAS-teknologi. I 2007 starta ho eit av dei fyrste RAS-anlegga i Noreg. I 2016 vart det bygd klekkjeri og startfôringsanlegg som òg er baserte på RAS-teknologi. Sommaren 2017 stod eit resirkuleringsanlegg for sjøvatn ferdig. RAS-teknologi bidreg til lågare miljøpåverknad og betre økonomi og kontroll i produksjonen.

Når fisken er klar til å dra frå anlegget i Tørvikbygd, vert han transportert i røyr under Tørvikbygdvegen, gjennom fjellet og ut til ein kai ved fjorden. Herifrå går han med brønnbåt til eit anlegg i sjø med lukka merdar på Fitjar. Etter fire—fem månader i lukka merd vert fisken frakta vidare til matfiskanlegg på Bømlo og i Austevoll.

Hardingsmolt var ei av Dagens Næringslivs såkalla gaselleverksemder i 2021. Dette er verksemder som har ein sunn økonomi og særskilt rask vekst. Hardingsmolt har hatt ein kraftig vekst i både omsetning og resultat dei siste åra. I 2020 og 2021 har det vore utfordringar knytte til biologi, men Drivenes forventar meir stabil drift og betre økonomi i 2022 og 2023.

Omsetninga til Hardingsmolt var 41 millionar kroner i 2017, med eit resultat på 7,9 millionar kroner. I 2020 var omsetninga 160 millionar kroner, og resultatet 16,9 millionar kroner.

Det er kring 20 årsverk knytte til anlegget i Tørvikbygd, og om nokre år er det planlagt at det skal vera 30 årsverk.

Store investeringar

Det er to aksjonærar i selskapet. Kobbevik og Furuholmen Oppdrett AS og Fremskridt Laks AS held til på Austevoll og Bømlo, og Hardingsmolt leverer postsmolt til deira matfiskanlegg.

Det er investert 300 millionar kroner dei siste åra, inkludert grunninvesteringar for vidare utviding. I åra som kjem skal ytterlegare 300 millionar nyttast til å utvida anlegget.

Dagleg leiar Drivenes fortel at det at eigarar på Bømlo og i Austevoll vel å investera mangfaldige hundre millionar i Kvam, har med lokal kompetanse og kultur å gjera. I Kvam er det folk som kan gjera jobben, påpeikar han.

Hardingsmolt vil dei neste åra forbetra prosessane og i endå større grad tenkja på løysingar som gjer at ressursar vert sette i krinsløp. Dette må skje i nært samarbeid med annan industri i regionen, fortel Hardingsmolt i pressemeldinga.