Skal halda kurs for innvandrarkvinner
Det er ikkje lett å navigera i lokalsamfunnet når du kjem som ny i landet og framand i Kvam.
Prosjektet Bygdemødre vil hjelpa til ved å kursa åtte til ti innvandrarkvinner i ti veker i tema som utviklinga til born og oppseding, aktivitet og ernæring, Nav-tenester, kunnskap om Noreg og fleire andre. Desse kvinnene skal så losa andre innvandrarar fram i samfunnet.
Rekrutterer innvandrarkvinner
Opphavet til tiltaket er prosjektet Bydelsmødre, som vart starta av pakistanske Nasreen Begum i Oslo i 2016. Fenomenet oppstod i Tyskland og Danmark.
Koordinator for Bygdemødre, Rut Oppedal Rasmussen, hadde eit formøte i juni med tilsette i ulike etatar i Kvam for å sikra eit godt samarbeid med heradet. Ut frå desse har ho fått med seg ei ressursgruppe som ho vil samarbeida med i prosjektet.
Rasmussen er i ferd med å rekruttera kvinner med innvandrarbakgrunn. Kvinnene vert kursa slik at dei vert brubyggjarar mellom kvinner, familiar og lokalsamfunnet, fortel ho.
Viss heradet vil ha ut informasjon på ein god måte, og kanskje ikkje har så lett for å koma i kontakt med innvandrarar, kan det vera høveleg å ta kontakt via bygdemødrene. Desse kan spreie informasjon raskt og effektivt, på mange språk.
Fekk stønad
– Me var så heldige å få bli med i eit pilotprosjekt og har fått pengar frå Bydelsmødre sentralt, finansiert av Integrerings- og mangfaldsdirektoratet (IMDi), seier Rasmussen.
Bygdemødrer har fått nok pengar til ein prosjektleiar, rundt 100.000 kroner.
Det er ei dialogbasert læring, så deltakarane er aktive i undervisinga.
– Det er hjelp til sjølvhjelp, seier Rasmussen.
Når deltakarane seinare skal ut og verka i lokalsamfunnet og rettleia andre kvinner, skal dei hjelpa kvinner til å hjelpa seg sjølve. Undervisinga er bygd på respekt og likeverd.
– Det er svært viktig. Det går mykje på kommunikasjon, sjølvsagt. Det vil me trena på i undervisinga, seier koordinatoren.
Mange isolerte kvinner
– Er det mange isolerte mødrer i Kvam?
– Det vil eg tru. Eg trur det er ein del som ikkje har jobb. Dei som eg spør om vil verta bygdemødrer, er ressurssterke kvinner som kan ta kontakt med andre. Kvinnene som skal verta bygdemødrer, må meistra norsk godt. Dei må vita korleis samfunnet er bygd opp og vera godt integrerte og ha eit godt nettverk. Det å bli bygdemor heng litt høgt, seier Rasmussen.
Ho kjenner mange innvandrarkvinner gjennom Grannehjelpa. Også i ressursgruppa har ho fått tips om kvinner som kan vera eigna til prosjektet. Nær sagt alle som skal halda føredrag eller innlegg er på plass.
Starten er lagt til 17. september, viss nok kvinner er påmelde. Så vil det gå slag i slag. Til no har responsen vore god, fortel Rasmussen.
Treng praktisk hjelp
– Er det mange traumatiserte mellom innvandrarane i Kvam?
– Eg kan ikkje uttala meg sikkert om det, men ein del kjem frå krig og elende og har opplevd mykje som me ikkje har opplevd. Mange har stor bagasje med seg hit. Me kan kanskje få nokre bygdemødrer lokalt som betre kjenner kvar skoen trykkjer, seier Rasmussen.
– Desse kan heilt sikkert hjelpa både traumatiserte kvinner og familiane deira. Men det kan òg vera behov for hjelp til praktiske ting, som å finna fram på nettet, seier ho.
Hjelpa kan handla om fritidsaktivitetar, til dømes. Det treng ikkje vera dei alvorlege, vanskelege tinga. Somme vil trenga hjelp i ein skulesituasjon eller til det å gå på foreldremøte.
– Alt som har med å delta i samfunnet, kan vera aktuelt, seier Rasmussen.
Prosjektet dreiar seg ikkje berre om flyktningar. Koordinatoren håpar å få med kvinner som er flytta til Kvam av andre årsaker òg.
– Opplegget er for alle, men fortrinnsvis dei med minoritetsbakgrunn. Det er ikkje lett å orientera seg i eit nytt lokalsamfunn, anten du kjem frå Nederland, Somalia eller Litauen, seier Rasmussen.
