Skal gje Herand reint vatn i springen
Herand vasslag SA ber Ullensvang kommune om løyve til å byrja å byggja nytt inntak, reinseanlegg og høgdebasseng.
— I sommar var behovet akutt, seier Olav Håvik i laget.
På grunn av svært lita vassføring i Storelvi-vassdraget fall kvaliteten og mengda på vatn til eit uakseptabelt nivå.
— Det var kokevarsel omtrent heile sommaren. Me hadde ei reserveløysing i ein brunn, men der forsvann grunnvatnet. Me nådde ikkje i det med ei pumpe, seier Håvik til HF.
No er det rikeleg med vatn.
— Det er veldig viktig for oss å få orden på vassforsyninga, skriv Håvik til kommunen.
Nesten heile bygda
Vasslaget forsyner mest heile bygda, kring 130 husstandar, med drikkevatn. Om lag 70 fritidsbustader er òg kopla på. Vasslaget forsyner både næringsmiddelverksemder, overnattingsverksemder og gardsbruk.
Mattilsynet har i over tjue år kravd at vasslaget leverer reinsa vatn.
— No, endeleg, kan me starta arbeidet med å byggja nytt reinseanlegg og høgdebasseng, seier Håvik.
Anlegga skal vera klare til våren eller sommaren 2022. Investering vert på om lag seks millionar kroner. Mattilsynet har godkjent prosjektet, opplyser Håvik.
— Det har gått altfor lang tid før me har fått dette til. Det skulle byggjast ut samstundes med Herand Kraftverk, men det vart forsømt. Me kom litt på etterskot. Men no skjer det i alle fall, seier Håvik.
Nytt basseng
Vasslaget skal byggja eit nytt høgdebasseng på 380 kubikkmeter. Inntaket kjem 900 meter lenger opp i vassdraget enn før.
Laget har ein del eigenkapital, låner pengar, og må justera vassavgifta etter kor mykje pengar ein treng.
Også ein del av det gamle anlegget lyt oppgraderast. Vasslaget har funne og tetta mange lekkasjar.
— Det er nok endå meir å tetta. Det må nye leidningar og kummar til, seier Håvik.
Om lag 15 husstandar og hytter er ikkje med i vasslaget, og har eige vassverk. Dei har no fått tilbod om å vera med, så også dei får reinsa vatn, opplyser Håvik.
