Skal fremja kystkultur med spel
Geir Johan Birkeland vil laga eit mobilspel som skal styrkja kunnskapen om kulturarv, fiske, havbruk, folk og historie.
Til det prosjektet bør spelutviklaren få 20.000 kroner frå kraftfondet, meiner rådmannen i Kvam herad. Søknaden lyder på 40.000 kroner, og totalkostnaden er 67.000 kroner.
Ifylgje søknaden skal spelet vera underhaldande, lærerikt og på nynorsk. Vona er lansera det i 2026. Det meste førearbeidet er allereie gjort.
– Eg har alltid hatt ein draum om å fortelja noko via spel. Difor utdanna eg meg til speldesignar, og har studert formidling og historieforteljing i spelform, skriv Birkeland, som har busett seg i Norheimsund.
Han reknar med at han vil tena inn investeringane om han får 5.000 til å kjøpa spelet.
– Om spelet attpåtil får gode omtalar i media og bidreg til at fleire kjøper spelet kan eg mogelegvis ha kapital nok til å utvikla fleire spel på lang sikt. Kanskje Norheimsund får sitt eige spelutviklingsfirma? skriv Birkeland i søknaden.
Formannskapet drøftar saka 7. november, før heradsstyret avgjer henne 14. november.
