Skal drøfta ny stilling

Det kjem fram i ein søknad til Kvam herad. Leiar i Fagforbundet Kvam, Line Lie, har på vegner av foreininga søkt heradet om meir frikjøp av hovudtillitsvald.

I dag er stillinga på 100 prosent. Det er for lite, ifylgje Lie. Ho meiner at fagforeininga har rett på meir. I fyrste omgang er vona å få ei stilling til på 50 prosent.

– I forhold til hovudavtalen har me rett på meir når me har fleire enn 15 ulike yrkesgrupper og inntil ein viss medlemsmasse. No har me vel 650 medlemer i kommunesektoren, og over 20 ulike yrkesgrupper er representerte, seier ho.

– Skulle søkt før

Lie har vore leiar i fagforeininga sidan 2018. Ho seier at arbeidsmengda lenge har vore for stor, og vedgår at det eigentleg skulle vore søkt for fleire år sidan.

– Kva er grunnen til at de ikkje har søkt tidlegare?

– Det er det sikkert fleire grunnar til, vil eg tru. Forbundet har vore heldig og hatt ein hovudtillitsvald som har opparbeidd seg mykje kunnskap over tid. Sidan ho har hatt lang fartstid, har ho klart seg godt. Fagforbundet i Kvam samarbeidde også ein del med Fusa før kommunen vart ein del av Bjørnefjorden, seier Lie.

Vel 700 med

Medlemstala i Fagforbundet Kvam har vore stabile dei siste åra. Det går litt opp og ned heile tida, ifylgje leiaren, men ligg stort sett på mellom 650 og 700. I dag har forbundet rett over 700 medlemer. Nokre av dei arbeider i privat sektor.

I dag er hovudtillitsvald sjukmeld, og styret har valt Lie til å vera vikar. Når ein får innkalling til tre møte på same tid, er det ikkje så lett, fortel ho.

– Det er ikkje ein «ni til fire-jobb». Det er jobb heile døgeret.

I slutten av august er Fagforbundet Kvam invitert til eit drøftingsmøte med rådmann Anita Hesthamar og HR-sjef Kari Sagen.