Skal brannsjekka campingplassane

Hardanger Feriesenter AS er fyrst ut og har fått varsel om tilsyn. Det har ikkje vore tilsyn der før, for campingplassen er ikkje registrert som eit særskilt brannobjekt.

— Me tenkte å sjå på han i år, på grunn av koronasituasjonen og at mange vil feriera i Noreg. Mange har registrert campingvogner og bubilar. Difor ynskjer me å ta ein tur på alle campingplassane i kommunen for å sjå til at branntryggleiken er vareteken, seier Vintertun.

Lovkrav mot brann

Brannvesenet pliktar å sjå til at verksemder i særskilde brannobjekt oppfyller krava i lov om vern mot brann, eksplosjon og ulukker med farleg stoff, brann- og eksplosjonsvernlova, førebyggingsforskrifta og internkontrollforskrifta, skriv etaten.

I tillegg vil tilsynet omfatta ansvaret til eigar og brukarar for naudsynt kontroll, ettersyn og vedlikehald av aktive og passive brannsikringstiltak, til dømes brannalarmanlegg, sløkkeutstyr og branncelleavgrensande bygningsdelar.

— Me ser ein auke i talet på nordmenn som skal på noregsferie. Salet av campingvogner og bubilar har auka, og me trur difor at mange av desse ynskjer å nytta seg av campingplassar og bubilplassar. Me ser difor farepotensialet for at det kan skje uynskte hendingar som høgt, skriv Vintertun i tilsynsvarselet.

— Pass på gassutstyr

Kravet til avstand mellom campingeiningane er tre meter, opplyser ho. Brannar kan skje, for gass, grillar og eingongsgrillar vert mykje nytta.

— Me får med oss dei brannane som er, men det er sjølvsagt noko me håpar på å unngå. Brann spreier seg fort slike stader, for campingvogner og bubilar er laga av mykje plastmateriale. Det er grunnen til at me ser på eit krav til avstand. Det er påbode med røykvarslar og sløkkjeutstyr i campingvogner, og gassdetektor og CO-varslar er òg med på å redda liv. Sjekk røykvarslaren kvar gong du tek campingvogna eller bubilen i bruk, for å sjekka at det i orden! oppmodar Vintertun.

— Kva er krava til bruk av gass?

— Så lenge utstyret er godkjent, skal det vera greitt nok.

— Kva kan ein elles gjera for å unngå brann på campingplassar?

– Ein må sjekka gasslangane regelmessig og sjå til at det ikkje er lekkasje i dei. Ein må ta omsyn til at utstyret er brannfarleg, og ikkje ha eingongsgrillar rett på treplatting eller i graset. Det kan føra til at eld spreier seg fort. Pass på at grillen ikkje kjem for nær campingvogn, bubil eller telt. Ein må bruka sunt vit, seier varabrannsjefen.

Dette vert det fyrste tilsynet Kvam brann og redning gjennomfører på ein campingplass.

— Nyttig orientering

— Det vert òg nyttig for oss for å sjå kva me kan forventa og vita kvar me skal køyra og korleis plassen er bygd opp viss ulukka skulle vera ute. Me vil spørja om det er bestemt oppmøteplassar og om korleis eigarane vil formidla branntryggleik til dei som kjem, fortel Vintertun.

Brannvesenet har ikkje høve til å gå inn i vognene til folk og sjå, men vil informera eigaren, så han kan informera gjestene, seier varabrannsjefen.

— Me håpar folk vil ta i bruk Noreg som ferieland i år. Det er difor me ser på dette. Folk har innsett at det ikkje blir nokon utanlandsferie, og vil bruka landet me bur i, kanskje òg lokalområdet. Me ynskjer alle ein brannsikker ferie, legg ho til.