Skadeverk i Norheimsund

Det opplyser politioverbetjent Andor Helgheim ved Kvam politistasjon.

Konstituert rektor ved skulen, Linda Haugland Jondahl, seier at hærverket vart oppdaga av nokre lærarar då dei kom på jobb rundt klokka halv åtte.

I det som er eit slags felles klasserom, som kan brukast av alle klassar, var alt av utstyr kasta utover. Alle tinga låg på golvet, fortel Jondahl. På tavla var det skrive stygge kommentarar. Også i eit tilhøyrande grupperom hadde det vore ubedne gjester. Dessutan var ei utgangsdør – som ifylgje Jondahl vart låst då skuledagen var over dagen før – open.

– Eg reknar med det er eit vindauge som har vorte gløymt. Det er ikkje teikn til innbrot, seier Jondahl.

Politioverbetjent Helgheim seier at politiet ikkje ser ein samanheng mellom hærverket og innbrota som har vore i Norheimsund dei siste dagane. I dette tilfellet er den eller dei skuldige truleg noko yngre, opplyser han.

Det var folk inne i skulebygget utanom skuletid også i fjor haust, men det har ikkje vore liknande episodar på skulen den siste tida, fortel rektoren.

– Skulen er heldigvis mykje i bruk også på ettermiddagar. Så er det jo mykje aktivitet i og rundt skulen og skuleplassen. Det er eg veldig glad for. Det er jo i utgangspunktet eit trygt område. Det er synd når slike ting skjer, seier Jondahl.

Elevane har fått med seg det som har skjedd, fortel ho. Politiet var innom ein tur på føremiddagen. Sjølv har ho vore innom i klasseromma til mellomtrinnet og sagt kva som har skjedd, og spurt om nokon har høyrt om noko eller sett noko. Då HF ringjer, er ho i ferd med å senda foreldra melding om hendinga.

– Eg håpar at om nokon veit noko, så tek dei kontakt. Ungar kan også trø feil. Så må me sjå på våre rutinar, seier rektoren.

Måndag føremiddag opplyser politistasjonssjef Terje Sperrevik ved Kvam politistasjon at det er oppretta sak. Han seier politiet «har litt å gå på», og at han reknar med saka vert oppklara nokså kjapt.