Skadar grovt stipulerte til 126 millionar kroner
Fylkesvegnettet vart stygt medfare av uvêret «Jakob» for to veker sidan.
Dei samla skadane er grovt stipulerte til 126 millionar kroner, utan moms. Tala er svært usikre, opplyser fylkesdirektøren i eit notat til hovudutval for samferdsle og mobilitet.
Dei største skadane kom i Hardanger, ikkje minst i Ullensvang. Berre gjenoppbygging av Edna bru på fylkesveg 550 i Ullensvang og Simadal bru på fylkesveg 5096 i Eidfjord kan samla kosta kring 95 millionar kroner. Arbeidet vert tidlegaste utført i 2025. Inntil vidare finst mellombelse bruløysingar.
Resten av den samla kostnaden gjeld opprydding og ymse andre skadar. I tillegg kan det henda at skadar, til dømes på bruer og røyrgater, enno ikkje er oppdaga, påpeikar fylkesdirektøren.
– Det er svært utfordrande å handtera ekstraordinære kostnader, skriv fylkesdirektøren.
Han vil søkja staten om skjønstilskot for å dekkja kostnader med naturskade. Kommunar som har meir enn 250 kroner i kostnad per ibuar, kan få halvparten av kostnadene dekte. Det føreset i så fall at skadane i Vestland aukar til 162,5 millionar kroner. Det er mogeleg, ettersom dei førebelse tala er svært uvisse.
Som fylgje av «Jakob» vart 40 fylkesvegar stengde, men 13 av dei berre sånn i tilfelle noko skulle skje.
Fylkesdirektøren varslar i notatet at han vil koma tilbake med meir informasjon om økonomiske fylgjer og om gjenoppbygging av bruer.
