Sjukehus over heile landet har heva beredskapen

Over halvparten av sjukehusa i landet har heva beredskapen den siste tida som følgje av mange innleggingar på grunn av luftvegsinfeksjonar.

Influensa, korona og RS-viruset byrjar å tære på kreftene til Sjukehus-Noreg. No har i alt elleve av 19 helseføretak, som styrer over om lag 40 små og større norske sjukehus, måtta heve beredskapen, viser ein gjennomgang NTB har gjort.

I dei regionale helseføretaka Helse vest og Helse Midt-Noreg er alle sjukehusa sette i grøn beredskap.

Det betyr at situasjonen er krevjande og må følgjast tettare enn normalt gjennom auka leiingsberedskap. Det kan også vere aktuelt å forsterke enkelte funksjonar.

Frå grøn til gul

I vest gjekk Helse Fonna i tillegg frå grøn til gul beredskap torsdag. Sjukehusa i Haugesund, Odda, Stord og Valen ligg under Helse Fonna.

– Kapasiteten er sprengd. Det er stort overbelegg og svært mange korridorpasientar. Vi har rett og slett plassmangel, opplyste fungerande direktør Kenneth Eikeset.

Gul beredskap betyr at sjukehusa må setje inn ekstra ressursar, og at planlagd aktivitet kan bli avlyst. Dermed kan pasientar som ventar på ein operasjon eller anna behandling, måtte vente lenger.

Men verken Helsedirektoratet, Helsetilsynet eller Folkehelseinstituttet (FH) hadde fredag oversikt over kva konsekvensar den auka beredskapen kan få.

Også i Helse nord er to sjukehus, Helgelandssjukehuset og Nordlandssjukehuset, sett i gul beredskap.

I Helse sør-aust er Sjukehuset Østfold og Sjukehuset Telemark sett i høvesvis gul og grøn beredskap. Tidlegare denne månaden gjekk også Drammen sjukehus over i gul beredskap på grunn av sprengd kapasitet.

Hevar ikkje

FHI tilrår sjukehusa å halde oppe beredskapen på grunn mange innleggingar og stort sjukefråvær.

– Belastninga på sjukehusa som kjem av luftvegsinfeksjonar, er større enn alle år før pandemien, skriv FHI i den siste vekerapporten sin.

Men på dei største sjukehusa i landet, Ahus og Oslo universitetssjukehus (OUS), er beredskapen framleis ikkje heva.

– Vi har gjort nokre tiltak som gjer at det ikkje er nødvendig, men vi følgjer nøye med, sa pressevakt Dag Kristiansen til NTB.

(©NPK)