Sju rutemeter til bry
Eit lite tilbygg til ei hytte ved Mulen i Herand har sysselsett byråkratar i snart to års tid.
Hytteeigarane Nils Petter Åstveit og Eli Kristine Heggernes har ynskt å føra opp eit tilbygg for å utvida den vesle hytta i Heiane hyttefelt, som vart regulert i 1988. Hytta deira er frå tidleg på 1970-talet.
Saka enda i vinter med eit avslag på dispensasjonssøknaden. Heller ikkje ein advokatklage og ein -førespurnad om å gjera om vedtaket var til hjelp. Statsforvaltaren har stadfesta den kommunale avgjerda og avvist å gjera om vedtaket.
Det var i fjor sommar kommunen fyrst avslo søknaden om dispensasjon, då ein del av tilbygget ligg i eit område avsett til jordbruk og skogbruk. Eigarane klaga på vedtaket gjennom HLT Advokatfirma AS. Dei meiner søknaden ikkje føreset dispensasjon, at det er gjort fleire sakshandsamingsfeil og at tilbygget uansett stettar krava for å få dispensasjon.
Sentralt i saka står ein teiknefeil i reguleringsplanen frå 1988 som gjorde ein del av tomta til jord- og skogbruksområde i staden for byggjeområde. Samstundes vart areal utanfor hyttetomta til byggjeområde. Kommunen og søkjarane er samde om denne feilen, men ser svært ulikt på korleis han bør handterast i ettertif.
Kommunen avviste dispensasjonssøknaden i august i fjor, og Statsforvaltaren stadfesta i februar vedtaket. Sistnemnde meiner at det vesle tilbygget ikkje ville ha sett intensjonen med reguleringsplanen vesentleg til sides, at føremonene ville vore større enn ulempene, og at den kommunale vurderinga ut frå omstenda i saka er streng. Han vil likevel ikkje overprøva det kommunale sjølvstyret.
Der tilbygget er teikna inn, og det altså er sett av eit jord- og skogbruksområde i planen, har eigarane i dag ein platting i tre. Kommunen meiner at det rette er å endra reguleringsplanen, ikkje å opna for for bit-for-bit-nedbygging av natur gjennom dispensasjonar.
Søknaden kom fyrst til kommunen i juni 2022. Kommunen bruka fem månader på å varsla søkjarane om at han var mangelfull. Kommunen kravde fyrst dispensasjon også frå utnyttingsgrada og byggjeforbodet i strandsona, men droppa sidan desse krava.
Den siste avgjerda frå Statsforvaltaren er lagd fram som referatsak i møtet til utval for samfunn, plan og næring 24. april.
