– Sjøhuset sprengjer rammene
Statsforvaltaren gjev Svein Kaptein Hovden rett i byggjehøgda, men meiner uansett at politikarane ikkje har høve til å akseptera eit så stort sjøhus.
Han klaga difor nyleg på vedtaket om å gje dispensasjon for bygget.
Etter hans syn set vedtaket omsyna bak kommuneplanen vesentleg til sides. Han meiner høgda og storleiken på tiltaket vil bryta med byggjestilen til tradisjonelle naust, og at det såleis vil sprengja rammene. Dessutan er vedtaket i strid med nasjonale føringar for forvalting av strandsona, heiter det.
Sjølv om Hovden har lagt til rette for bygget og allereie har utført omfattande «anleggstilrettelegging» på land og i sjøen, vil tiltaket auka privatiseringa av strandsona vesentleg, meiner Statsforvaltaren. Etter hans syn kan dispensasjonen skapa ein uheldig presedens.
– Andre vil kunne forventa at dei vil kunne føra opp tilsvarande bygningar i strandsona, skriv han i klagen.
Han meiner eit så stort tiltak krev vurderingar og avklaringar i ein arealplanprosess, og viser til at kommunen er i gang med å laga ein ny kommuneplan for heile kommunen.
I sjølve brevet til Statsforvaltaren med varsling om vedtaket 7. april har ikkje kommunen korrigert høgda på bygget, men synspunkta til Hovden går fram av klagen frå Hovden og saksutgreiinga. Hovden har i fleire e-postar og over telefon gjort kommunen merksam på feila.
– Statsforvaltaren må gjerast merksom på at hans førre vurdering var basert på feiltolking av teikningar. Slik det står no, får Statsforvaltaren framleis inntrykk av feil høgd, at det skal vera turisme i området og næring i naust. Det vil han jo aldri godta – og ikkje er det rett heller. Me må halde oss til fakta i offentlege sakspapir, ikkje fortsetja å repetere feila som ein er blitt gjort merksam på mange gonger, skriv Hovden i ein straumpost til kommunen.
Statsforvaltaren skriv i klagebrevet, der målsette teikningar er limte inn, at mønehøgda er 8,8 meter. Det er i samsvar med høgda Hovden har halde fram som den korrekte.
Utvalet skal handsama klagen onsdag 16. juni. Rådmannen, som tidlegare har avslege og frårådd dispensasjonen, bøyer seg no for den politiske viljen og vil avvisa klagen. Om det vert gjort, hamnar saka på bordet til ein setjestatsforvaltar.
