SjøAktiv Strandebarm er opna

– Det er nydeleg natur i Strandebarm, men det er aldri nok med nydeleg natur for at det skal vera attraktivt å flytta dit. Fin natur er det mange stader i Noreg. No vert det meir attraktivt både å bu der og å koma dit, seier ordførar Torgeir Næss (Ap).

SjøAktiv Strandebarm har prøvd å arrangera ei opning tidlegare, men har vore nøydd til å utsetja. Laurdag vart det invitert til opning på bryggjekanten, og snora vart endeleg klipt.

Per Arne Berge, leiar i Strandebarm idrettslag, tykte det var kjekt å sjå at så mange ville vera med på feiringa.

– For meg som leiar er det ei stor lukke å kunna stå her og gjennomføra dette, sa Berge i talen sin til dei frammøtte.

Han innrømte at han hadde førebudd nokre liner i talen om kor ufatteleg heldige arrangørane var med vêret, men dei linene laut han stryka. Regnet ausa ned kort tid etter opninga byrja. Då Berge var ferdig med talen, var dropane vekke.

Sjå bilete frå feiringa her:

At det hadde teke tid å få arrangementet på plass, gjorde ingenting, ifylgje leiaren. No er nemleg endå fleire prosjekt klare for opning.

Dei aktive eldsjelene i laget sit sjeldan i ro.

Går fort i svingane

Berge sikta til den nye minigolfbanen som ligg mellom marinaen og idrettsbanen. Han fortalde at ei av dei positive utfordringane med å vera leiar i laget er at før han rekkjer å snu seg om etter eit fullført prosjekt, er nye på gang.

Det vart nemnt ein minigolfbane like etter at aktivitetssenteret ved sjøen stod klart. Søknad vart send, og no er han på plass.

– Men alt kan ikkje gjerast på dugnad. Det har også kosta pengar, sa Berge.

Banen har kosta kring 600.000 kroner, inkludert dugnadstimar. Han takka spesielt bidragsytar Terje Øvrehus for god hjelp.

Dugnadsdriv

– Eg må rosa all den viljen og dei bidraga som har gjort til at me har fått sett dette i stand, sa Berge.

Etter at SjøAktiv Strandebarm var ferdig, har det i tillegg til minigolfbana kome opp eit ekstra naust. Det er stadig utvidingar, fortalde han. 7.500 dugnadstimar er noterte. Den totale prisen nærmar seg ti millionar, ifylgje leiaren.

Over fem millionar er betalt med pengegåver og tilskot, og det er rekna kring 2,2 millionar i dugnadsinnsats. Det kjem også eit tilskot på 2,2 millionar kroner i tippemidlar. Trond Mohn vart nemnt som ein viktig bidragsytar.

Aktiviteten ved senteret er allereie stor. Mellom anna har 100 personar har teke våtkurs, og fem har utdanna seg til instruktørar. Dessutan er det på plass padlebrett, kajakkar og kanoar til store og små.

Ifylgje leiaren ynskjer idrettslaget å få på plass jollesegling og fridykking.

– Opnar moglegheiter

Ordførar Torgeir Næss (Ap) fekk æra av å klippa snora. Han sa at arbeidet som er gjort, ikkje berre er viktig for å skapa aktivitet. Det er også gjort på ein usedvanleg vakker og tiltalande måte. Det som imponerer ordføraren mest, er dugnadsarbeidet. På vegner av Kvam herad takka han for arbeidet som er gjort.

Ifylgje ordføraren tilseier framskrivingane til SSB at kvemmingane skal verta færre og mykje eldre dei neste tiåra. Han er overtydd om at dei tek feil. Med ei framtid der stadig fleire store bedrifter og offentlege organ lyser ut stillingar med arbeidsplass kor som helst, meiner han at det opnar seg moglegheiter.

– Folketalet veks ikkje lenger i bysentrum. Det veks mest i omlandskommunane. For at Kvam skal vera ein plass folk ynskjer å bu, er det viktig med gode bu- og oppvekstmiljø. Då er levande bygder med breie aktivitetstilbod akkurat det me treng, og det er det de i Strandebarm jobbar fram, sa han.