Det er ikkje fritt fram for å hengja opp skilt langs offentlege vegar.

– Sjekkar om skilt er ok

Er eit reklameskilt på Kvamskogen ulovleg? undrar Regel Rytter.

Sigbjørn Linga
Bladstyrar
Publisert

Rytter viser til eit skilt som heng ved fylkesveg 49.

– Skiltet heng slik til at ein ikkje kan sjå skikkeleg kva som står før ein omtrent passerer skiltet, og ein må då vri hovudet cirka 90 grader for å få med seg bodskapen, skriv avsendaren.

Vedkomande har sjølv gjeve svar på eige spørsmål. Hen meiner at plasseringa ikkje er i tråd med reglane, då skiltet kan distrahera trafikantane og skapa trafikkfarlege situasjonar.

Fylkeskommunen svarar, ut frå vegfoto, at det ser ut til at skiltet vart hengt opp ein gong i 2018 eller 2019. I ettertid er utforminga endra. Fylkeskommunen har oppretta sak og kjem til å ta kontakt med dei som har ansvar for reklamen. Om han ikkje er godkjend, kan eigaren få krav om å fjerna han.

Føringane for skilt langs offentlege vegar finst i paragraf 33 i veglova. Reklameskilt og private skilt langs fylkesvegar er søknadspliktige. Reklame som syner namnet åt ei verksemd, kan plasserast på bygningane til verksemda utan løyve. I det aktuelle tilfellet kan ikkje fylkeskommunen sjå at verksemda har eigedom på den aktuelle staden på Kvamskogen.

Om nokon skulle meina at Regel Rytter er eit oppdikta namn, er vårt svar: Det er mogeleg. Red.

Paragraf 33 i veglova

• «Reklameskilt eller liknande innretning må ikkje utan løyve plasserast ved offentleg veg eller plasserast slik at dei er retta mot vegtrafikken eller er synleg for dei vegfarande. Reklameskilt eller liknande innretning som syner namnet åt ei verksemd eller kva verksemd det er, eller som på annan måte reklamerer for verksemda, kan likevel plasserast på bygningane åt verksemda utan løyve. Finn vegstyremakta at eit slikt reklameskilt eller liknande innretning er trafikkfarleg, kan ho gi påbod om å fjerne dette etter regelen i fjerde ledd.

• Løyve kan gjevast inntil vidare eller for ei avgrensa tid dersom vegstyremakta finn at reklameskiltet eller innretninga ikkje vil vere trafikkfarleg. Som trafikkfarleg reklame reknar ein innretning som kan takast for trafikksignal, vegskilt eller vegmerking, eller hindre den frie sikta langs vegen, eller som kan trekkje dei vegfarande si merksemd vekk frå vegen eller trafikken.

• Med sikte på å unngå fare for dei vegfarande, kan departementet sette forbod mot visse slag reklameskilt og liknande innretningar og mot å sette slike skilt og innretningar på visse stader eller ved visse vegstrekningar.

• Blir reklameskilt eller liknande innretning plassert i strid med det som er fastsett i eller med heimel i denne lova, eller blir reklameskiltet eller innretninga endra slik at desse blir i strid med lova, kan vegstyremakta straks syte for at dei blir tekne bort, flytta eller endra. Den ansvarlege lyt då bere kostnaden, dersom han ikkje sjølv syter for å ta bort, flytte eller endre reklameskiltet eller innretninga innan ein fastsett frist. Dersom vegstyremakta finn det naudsynt av omsyn til trafikktryggleiken, kan førehandsvarsel etter forvaltningslova unnlatast. Varsel som gjeld mange einskilde partar kan kunngjerast i eit blad som blir vanleg lese på staden.

• Avgjerd etter første, andre og fjerde ledd tar Statens vegvesen for riksvegar, fylkeskommunen for fylkesvegar og kommunen for kommunale vegar.»

Kjelde: lovdata.no

samferdsel vestland fylkeskommune nyhende kvamskogen politikk
Laga med Labrador CMS