Sjå opp for takras!
Gards- og huseigarar har ansvar for å bidra til at det er trygt og framkommeleg ved eigedommen deira. Gløymer du til dømes å setje opp varslingsskilt om takras, risikerer du bot på 5.000 kroner.
– Med dette vêret må fotgjengarar vere forsiktige. Store istappar eller snøras kjem plutseleg susande frå taka. Det kan ende stygt, seier fagsjef i Frende Forsikring, Lill Cecilie Bjørndal Klementsen, i ei pressemelding.
Selskapet minner om at det store snøfallet krev ekstra innsats frå gard- og huseigarar, som har eit særleg ansvar for å bidra til at det er trygt og framkommeleg ved eigedommen deira.
Artikkelen held fram under annonsen.
– Det første ansvaret til huseigar er å setje opp varslingsskilt, eller avvisarar, som det heiter i politivedtektene. Viss du gløymer det, risikerer du ei bot på 5.000 kroner. Sett også opp sperreband, seier Klementsen, og minner om at skilt og sperreband skal fjernast seinast innan sju dagar etter at faren er over.
Huseigarar er i tillegg ansvarlege for at bygningar og tomter mot offentlege stadar blir haldne ved like slik at ingen blir skadde. Det omfattar mellom anna å rydde vegar og fortau for snø og is og fjerne snø frå tak.
Viss det likevel skjer uhell, er det ein fordel om huseigar, gardeigar, styret i bustadselskap eller sameige kan dokumentere at dei har vore i kontakt med eit firma som kan fjerne isen.
Sjekkliste for huseigarar
• Set opp varslingsskilt og sperreband med ein gong det er fare for takras
• Mok snø frå vegar og fortau før det frys på
• Strø vegar og fortau du har ansvar for
• Fjern snø frå taket for å unngå takras
• Fjern takras frå veg eller fortau
• Gjer jobben innan rimeleg tid, seinast dagen etter snøfall
• Tenk på din eigen tryggleik på taket og vurder profesjonelle vaktmeistertenester
(©NPK)
