Shaina opp skulen
Då barneskulen i Norheimsund ville smykka ut gangane med harmonisk kunst, var ikkje den lokale kunstnaren Lina Valland Lyngset vond å be.
Avdelingsleiar for 1. til 4. trinn, Anne Cathrine Eiken, tok kontakt med Valland Lyngset. Ho ynskte fleire fargar og eit meir harmonisk uttrykk i gangane og andre fellesareal på skulen. Eiken hadde sett nokre av dei tidlegare prosjekta til kunstnaren, og ho vart overtydd om at ho kunne bidra til eit betre læringsmiljø for elevane.
Valland Lyngset var positiv til ideen heilt frå starten av. Ho fekk med seg systera Aina Amalie Valland på prosjektet. Valland har erfaring frå mange ulike interiøroppdrag i lokale nytta til arbeid med barn og ungdom: opphaldsrom, aktivitetsrom, kontor, hyblar, og heile institusjonsavdelingar. Ho har sett at det å gjera det lunt og triveleg, vert sett pris på, og at det tryggjar dei som oppheld seg der.
— Me har begge sosialfagleg bakgrunn og langvarig interesse for fargar og interiør, så me er gode støttespelarar, seier Valland Lyngset.
– Gratis draghjelp
Saman har dei starta selskapet Shaina AS, som tek på seg interiøroppdrag i både private heimar, offentlege rom og bedrifter. Dei ynskjer å skapa rom som inspirerer.
Systrene har teke kurs i fargesetjing for å spissa kompetansen endå meir.
– Det løner seg faktisk å tenkja på interiøret, både med tanke på økonomi, personalressursbruk og det sosiale miljøet. Eg trur lærarane kan få mykje gratis draghjelp i undervisninga ved å gjera noko med lokala, hevdar Lyngset.
— Det er mykje forsking på at omgjevnadene har ein innverknad på folk, seier Eiken.
Ho er svært glad for at Shaina AS ville vera med på å smykka ut skulen. Avdelingsleiaren seier at også elevrådet har bidrege med sine midlar i prosjektet.
— Elevane likte kunsten og ville ha meir av den, seier ho.
Høver til pedagogikken
Valland Lyngset seier at offentlege bygg ofte anten er heilt fargelause eller har ein altfor ofseleg fargebruk.
– Det siste var tilfellet i fleire av områda me no har endra på. Det var til dømes ei utfordring å finna gode fargar til eit område med knall oransje golv. Men slike utfordringar triggar òg kreativiteten og kan gje ekstra spennande sluttresultat.
Eiken seier at kunsten går godt saman med filosofien til skulen. Ein har lenge lagt vekt på musikk for å betra læringstilhøva, og no har skulen òg fått eit estetisk løft som høver godt inn i denne pedagogiske tilnærminga. Det gjev rom for både tanke og refleksjon, samstundes som nokon kanskje får stadfesting gjennom kunsten. Avdelingsleiaren vonar skulen kan få til fleire samarbeid med den vesle, nystarta verksemda, og ho er glad for at det no finst eit slikt tilbod lokalt i kommunen.
Også dei tilsette ved skulen er nøgde med sluttresultatet bekreftar ho. Eiken og Valland Lyngset meiner at fargevala ser dristige ut ved fyrste augekast, men når ein kjem nærare, ser ein kor godt det passar inn.
— Utsmykkinga gjev energi og ro. Me merkar endring i korleis elevane oppfører seg i desse områda, seier Eiken.
