Sette rekord i raustleik
I Kvam herad var det måndag registrert totalt 711.444 kroner til årets tv-aksjon. Det er truleg ny rekord.
Summen plasserer heradet på 153.-plass av landets 358 kommunar, om ein reknar han om til raustleik per innbyggjar. I Vestland var Kvam nummer 26 av 43, syner tal frå nettstaden giverstafett.no.
Summen er soleklart betre enn i dei siste fem åra, som er så langt statistikken på nettsida strekkjer seg. I fjor vart 521.432 kroner samla inn. Ikkje minst har bidraga frå næringsliv og organisasjonar auka i år, frå 37.571 kroner i fjor til 175.567 kroner i år.
Den rausaste gåva i Kvam kom frå oppdrettsverksemda Lingalaks, som gav 40.000 kroner til aksjonen. Kvam herad gav 20.000 kroner.
– Me er veldig nøgde med resultatet, seier ordførar Torgeir Næss (Ap), som er nokså trygg på at resultatet aldri har vore betre i Kvam.
Ullensvang kommune samla inn 992.047 kroner. Det plasserer kommunen på 133.-plass i landet, og på 23.-plass i Vestland, om ein fordeler summen på innbuarane. Også her vart det rekord. Førre rekord, frå i fjor, var 859.595 kroner.
I Ullensvang var næringslivs- og organisasjonsbidraget lågare enn i Kvam. Nærare bestemt 127.623 kroner. Den høgaste summen kom frå Hydro Energi Røldal, som overførte 50.000 kroner til aksjonen. Kommunen sjølv gav 30.000 kroner. Jondal Precision Industries gav 10.000 kroner.
Sjølv om det i Kvam herad ikkje er samla inn pengar i fysiske bøsser, er «bøsse» ein kategori i statistikken. Ein annan kategori er «privat». Næss veit ikkje kva det tyder.
Pengane frå tv-aksjonen går i år til Barnekreftforeningen.
HF gjer merksam på at dagleg leiar i Hordaland Folkeblad AS har donert 5.000 kroner til aksjonen. Red.
Les også:
