– Sette opp skilt utan vedtak
Då ei oppgradert strekning av Fitjadalsvegen vart levert til Kvam herad i slutten av september, var ny fartsgrense allereie på plass. Men ikkje søkt om.
Heradet skreiv sjølv om overleveringa på heimesida. Mellom anna stod det at prosjektleiarar i GBS Entreprenør AS og byggjeleiaren i Kvam herad hadde sikra god framdrift og kvalitet i prosjektet.
Men nett skiltinga gjekk kanskje litt for fort.
– Med det nye fortauet på plass er det sett ei fartsgrense på 30 kilometer i timen langs strekninga, mot tidlegare 50. Dette er eit viktig tiltak for å sikra trygg ferdsel, særleg for born og skuleelevar, står det i saka frå 30. september.
Men fyrst 15. oktober vart eit framlegg om redusert fartsgrense sendt på høyring til politiet og Statens vegvesen. Desse er bedne om å uttala seg innan månadsskiftet. Strekkja det er søkt om går om lag frå krysset mellom Fitjadalsvegen, Leitesdalen og Skårdalsvegen, til forbi dei siste bustadene langs Fitjadalsvegen.
Det er kommunane sjølve som vedtek fartsgrenser på kommunale vegar, men Statens vegvesen har eigne fartsgrensekriterium for når dei ulike fartsgrensene skal og kan nyttast.
I høyringsbrevet skriv heradet at det i kriteria er skildra som eit «bør-tiltak» med særskild fartsgrense på 30 kilometer i timen på strekningar som er tilkomstvegar, samlevegar og hovudvegar. Heradet meiner strekninga stettar kriteriet.
Nils Eivind Stranden, konstituert teknisk sjef i Kvam herad, skriv til HF at det stemmer at heradet har vore litt for rask med å setja opp skilta.
– Dei gamle 50-skilta skulle vore hengde opp inntil nytt vedtak var gjort, vedgår han.
Grunnen til at nokre 30-skilt allereie er komne opp, er at skiltsøknaden vart send litt seint i forhold til ferdigstillinga av prosjektet, skriv Stranden. Han håpar folk likevel er nøgde med arbeidet som er gjort. Kva som er grunnen til at skiltsøknaden vart sein, svarar han ikkje på.
– Kva meiner vegvesenet om denne måten å gjera det på?
– Det er ikkje heldig, men det er kommunen sjølv som er skiltmynde på kommunal veg. Me har ikkje mynde til å føra kontroll, seier Kristin Hagen Hæreid, overingeniør i Statens vegvesen.
Ho påpeikar at om ein set opp trafikkregulerande skilt utan vedtak, er det ikkje gyldig. Det vil seia at ein til dømes ikkje kan handheva den reduserte fartsgrensa.
Ikkje alle 30-skilta er sette opp, opplyser Stranden. Det er til dømes framleis 50-skilt rett ovanfor krysset mot Kyrhagen. Vonleg vil det etter vedtaket koma 30-skilt også der, skriv han.
