Sette ny stønadsrekord

Det melder fondet i ei pressemelding.

I Kvam fekk Kåre Nes mest: 200.000 kroner til ein turbin i gardssaga på Nes. I Jondal fekk Guttorm Brattebø mest:150.000 kroner til grindverksløa på Flatabø.

I Vestland vart det i alt tildelt 15,5 millionar kroner, ein auke på 48 prosent samanlikna med 2020. Auken er størst i landet. Ved årsslutt enda talet på søknader på 2.112, også det ny rekord.

Kulturminnefondet gav stønad til over 40 prosent fleire prosjekt enn året før.

— Me er svært nøgde med at så mange har søkt om støtte, for det tyder at stadig fleire ser verdien av å ta vare på kulturminne, og at dei ser at bygget dei eig, båten dei seglar med eller huset dei bur i, har verdi i lokalsamfunnet, seier styreleiar i Kulturminnefondet, Tine Sundtoft.

Kulturminnefondet er ei statleg tilskotsordning for private eigarar og frivillige organisasjonar, direkte underlagd Klima- og miljødepartementet.

Fondet er eit lågterskeltilbod til eigarar som vil setja i stand kulturmiljøet rundt seg. Ein kan òg få tilskot til fag- og handverksseminar. Søknadene vert handsama heile året, og det er ingen søknadsfrist.