Ullensvang sette krisestab

Odda var isolert av skred og flaum sundag. Siste nytt er at vegane kan opna klokka 12.

Uvêret, med mild luft, stor nedbør og sterk vind, førte til fleire stengde vegar i Hardanger sundag.

Mellom anna vart fylkesveg 49 mellom Odda og Jondal stengd minst til klokka 08 måndag.

Måndag føremiddag melde kommunen i ei oppdatering at hovudvegar kring Odda framleis var stengde. Geologar hadde kome til området for å vurdera stoda i dagslys, og det kunne verta opna vegar att klokka 12.

Førebyggjande åtgjerder

Kriseleiinga møttest sundag kveld og opplyste i ei pressemelding mellom anna om fylgjande

• Ferjene mellom Utne og Kvanndal og mellom Jondal og Tørvikbygd skulle ha nattberedskap.

• Raudekrossen-båten ville vera på plass på Nå klokka 06.15 for å frakta folk til arbeid i Odda.

• «Pilagut» frå Jondal skulle vera klar for oppdrag i Odda frå klokka 07.30. Det viste seg seinare at han vart seinka, men planen var å få han i rute mellom Odda og Nå klokka 10.15.

• Helsepersonell frå Jondal hjelper til med tilsyn i Mauranger i Kvinnherad.

• Odda ungdomsskule vert stengd måndag. Dei andre skulane er opne, men ein del elevar må vera heime ettersom vegar er stengde.

Ordførar Roald Aga Haug (Ap) minner folk om å fylgja med på vegmeldingane.

Meir i vente?

Vegvesenet opplyser i ei pressemelding måndag morgon at folk må rekna med stengde vegar og redusert framkome også måndag.

– Det er mykje vatn, sterk vind og stor skredfare i indre deler av Vestland og deler av Rogaland, seier Svenn Egil Finden, avdelingsdirektør i Statens vegvesen.

– Mange vegar er allereie stengde, og fleire vegar, bruer og ferjesamband kan verta stengde på kort varsel i løpet av natta og morgontimane.