Sette kriseleiing på skule

– Hendingar på skulen, men også på fritida har påverka skulemiljøet, opplyser rektor Kari Ljones.

Hausten har òg vore prega av utfordringar med sjukefråvær og ledige stillingar. Elevar og tilsette har gjeve uttrykk for at dei opplever skulemiljøet som utrygt. Situasjonen er samansett, skriv Ljones i ein e-post til HF.

Fleire tiltak er sette i verk for å prøva å bøta på problema. Mellom tiltaka er fleire vaksne i friminutta, kurs om pedagogisk og terapeutisk meistring av vald, og støtte og hjelp frå bedriftshelsetenesta.

I ein periode har skulen vore under lokal kriseleiing. Det vil seia at rektor prioriterte oppgåver ut frå situasjonen og tok avgjerder utan dei vanlege involveringsprosessane, opplyser Ljones.

– Skulen fekk då handlingsrom til å tileigna seg naudsynte verktøy for å koma tilbake til ordinær drift snarast råd, skriv rektor.

Det er ikkje fyrste gong det er sett kriseleiing på skulen, opplyser leiar for skule, Inga Lill Jensen Tolo. Skulane har hatt slike ordningar i samband med beredskapshendingar som pandemi og vegstengingar, som del av overordna kriseleiing, skriv ho i ein e-post. Rektor, avdelingsleiarar, leiar for skule, oppvekstsjef og skulefagleg rådgjevar har delteke i kriseleiinga.

Skulen meiner no å ha oversikt og kontroll over situasjonen, og jobbar vidare med planlagde tiltak.