Set trafikktryggleik på dagsordenen på Mundheim

Det skriv Mundheim Grendautval i eit innspel til den kommunale trafikksikringsplanen. Grunnen er at det dei siste åra har vore mange ulukker i gravdalssvingen, og at skuleborn må gå i vegen for å koma til busstoppet.

Det trengst lys i tunnelen i Gravdal og fram til busstoppa, meiner utvalet. I tillegg trengst gangfelt for skuleborn i Gravdal og eit skikkeleg busstopp på sida mot sjøen. 50-sona inn til Mundheim bør flyttast sørover, då ho i dag startar for nær sentrum, og ferjetrafikken kjem med stor fart, skriv utvalet.

Gang- og sykkelvegen – strandpromenaden – som går fram av den godkjende reguleringsplanen for Mundheim sentrum, må på plass mellom fjøra og Mundheim terminal. Dette er ei strekkje med mykje trafikk og høg fart. Her ferdast mange gåande og spesielt mange skuleborn. Om sommaren er det her mange turistar som brukar badefjøra, og det skapar stor trafikkfare, skriv utvalet.

Det manglar lys på busstoppet ved Mundheim terminal. «Stabbesteinane» ved terminalen må ryddast opp i, og «flaskehalsen» på Leirstein må utbetrast. Her skjer trafikkulukker kvart år, og utbetringa bør kunna finansierast med lite pengar, meiner utvalet.

I Nes-krysset er det 80-sone og dårleg sikt. Skuleborn kryssar vegen her. Skulebussen bør sleppa av skuleborn på motsett side ved krysset, slik at dei slepp å kryssa vegen. Grendeutvalet påpeikar at det er rasfare på og rundt Mundheim, både på skulevegane og sjukeheimsvegen. Nærare bestemt gjekk det nyleg skred i Teiglandsberget. Dette området må prioriterast, skriv utvalet.

Vegen mellom Nes-krysset og Mundheim er smal og gjev rom for berre éin bil. Lia over vegen er svært skredutsett og må med som skredsikringspunkt, oppmodar utvalet. Også strekkja frå Mundheim til Furhovde er utsett for skred, og Kvitelva går over vegbanen når det regnar sterkt, påpeikar utvalet.