– Set opp fareskilt
Etter tre ulukker på ti år ynskjer Vestland fylkeskommune å setja opp fareskilt om farleg sving ved Tveitneset i Ytre Ålvik.
Tveitneset er eitt av punkta under «fysiske tiltak» i trafikksikringsplanen til Kvam herad. Svingen er skildra som eit ulukkespunkt, og tiltak som skilting eller liknande må vurderast, står det.
Vestland fylkeskommune var på synfaring med heradet på den aktuelle staden i 2023, og har no teke tak i saka. I eit brev datert 18. oktober bad fylket Statens vegvesen om å godkjenna eit fareskilt for farleg sving. Fareskilt er naudsynt for å redusera overraskingsmomentet og synleggjera svingen betre fram til ein eventuelt kan gjera utbetringar og fjerna eller redusera faremomenta, skriv fylkeskommunen.
I dag er svingen skilta med «retningsmarkering», og fartsgrensa er 60 kilometer i timen.
Statens vegvesen har vedteke ynsket om fareskilt. I vedtaksbrevet vert svingen skildra som skarp, bratt og med kort stoppsikt.
– Me vonar dei nye skilta vil få vegfarande til å senka farten ytterlegare fram mot og gjennom svingen, skriv Daniel Melve Kvarme, som jobbar med vegforvalting i fylkeskommunen, til HF.
