Set i gang stibygging
Ei gruppe sherpaer vil snart vera på plass i Herand. Då byrjar arbeidet med å oppgradera turstien til Samlen.
Det opplyser leiaren i arbeidsgruppa til Herand Idrettslag, Reidun Haugen Dalseth.
Ifylgje Dalseth har arbeidsgruppa fått klarsignal frå kommunen for å starta arbeidet med å byggja sherpasti til det populære turmålet i Herand. Om alt går etter planen, skal seks sherpaer i gang med jobben om få dagar. Det er varsla at dei kjem fredag.
Stien skal starta ved Mælsvegen og møta den noverande stien lenger oppe i terrenget. På den nye strekkja er det tenkt to nye utsiktspunkt.
Idrettslaget har funne ein mogleg parkeringsplass ved Mælsvegen. Dalseth seier at området, som er regulert til parkering til hytter som ikkje er bygde, er godt eigna. Ho understrekar at det enno er usikkert kvar den endelege parkeringsplassen vert, men at arbeidsgruppa er i dialog med kommunen.
Grunneigarane er ifylgje Dalseth positive til planane. Dei har inngått ein mellombels avtale med idrettslaget om å bruka området til landingsplass for helikopter og til lagring av stein.
Arbeidsgruppa har laga ei liste som viser kva område som skal prioriterast. I fyrste omgang skal sherpaene arbeida med den nye delen av traseen. Dalseth seier at det mellom anna er nokre bratte parti på strekkja som er prioriterte.
Pengane som idrettslaget har samla inn, skal vera nok til å få plass det fyrste stykket av den nye turstien. Gruppa vonar å skaffa pengar til den andre delen neste år.
– Me har inngått ein avtale med stibyggjarane, så dei veit kva me har å gå på, forsikrar Dalseth.
