Set i gang igjen med fleire rom ved Akkjerhaugen

Ard Arealplan AS kunngjorde nyleg oppstart av detaljreguleringa ein gong til på vegner av tiltakshavar Acos Invest AS. Det same vart gjort for temmeleg nøyaktig fire år sidan. Planframlegget førte den gongen til ymse innvendingar, ikkje minst frå Statsforvaltaren.

Bakgrunnen for den nye kunngjeringa er at det er trong for hotellfunksjonar ikkje berre i den nordlege, men også i den sørlege delen av planområdet. I sør er arealet sett av til friareal i kommuneplanen. I tillegg er kaiområdet utvida. Dei endra føresetnadene medfører krav om ny varsling, skriv AA i eit brev til Ullensvang kommune.

Fleire rom

Planområdet på vel 20 mål omfattar ein del av Akkjerhaugen og skrår ned mot sjøen i vest. I området ligg Hardanger House, som i si tid vart etablert utan reguleringsplan, men med dispensasjon frå kommuneplanen. Området inneheld i kommuneplanen det nemnde friarealet pluss næringsareal, attåt ei omsynssone kring kulturminne i Akkjerhaugen.

Planen er å leggja til rette for eit nytt kurs- og konferansesenter – omtala som bresenter på grunn av utforminga – med både hotellrom og andre hotellfunksjonar, pluss mogelegheiter for mellom anna restaurant, kontor og kulturtilstellingar, skriv AA. Ved sjøen er vona å få etablert ei ny bryggje for både større og mindre båtar, og frå denne skal det gå turstiar til toppen av Akkjerhaugen.

Området ved det omstridde badehuset, som enno ikkje er formelt godkjent, er utsett for erosjon. Planen skal leggja til rette for erosjonsvern og gjera badeplassen meir attraktiv for ålmenta.

– Oppsummert ynskjer ein med planforslaget å gjera innseglinga til Jondal til eit estetisk fint område, gjera området rundt Akkjerhaugen betre tilgjengeleg for ålmenta og turistar, og skaffa aktivitet og næringsutvikling i Jondal, skriv AA.

– Treng ikkje KU

AA meiner at tiltaka ikkje er av ein slik art at dei utløyser krav om konsekvensutgreiing, av di dei ikkje får vesentlege verknader for miljø og samfunn. Dette er vurdert i ei eiga utgreiing.

– Store delar av planområdet ligg innanfor 100-metersbeltet mot sjø. Til trass for at det vert bygt tett på strandlina, har det i planarbeidet vore viktig å vareta områda tettast på sjøen og sikra at ålmenta skal ha tilkome her. Det har vidare vore fokus på å leggja til rette desse områda på best mogleg måte for ålmenta og gjera dei attraktive. Dette har ein prøvd å få til samstundes som ein skal gjera minst mogleg inngrep tett på strandsona, heiter det i vurderinga.

Rådmannen har konkludert med at han er samd i at konsekvensutgreiing ikkje er naudsynt.

Tiltakshavaren og kommunen hadde oppstartsmøte om saka 15. desember. Referatet vart journalført ein månad seinare. 30. november var det eit dialogmøte mellom partane der også ordførar Roald Aga Haug (Ap) deltok. Av referatet, journalført halvannan månad seinare, går det fram at hotellet vantar gyldig bruksløyve. Bruksløyvet er nemleg gjeve på vilkår av at det vert utarbeidd reguleringsplan. Korkje hotellet eller badehuset kan få ferdigattest før planen er vedteken.

Fristen for å senda merknader til oppstarten er 12. mai.