Set høge mål for oppdrettsnæringa

Det er mellom innspela som Vestland fylkeskommune no gjev til Nærings- og fiskeridepartementet, ifylgje vlfk.no.

Ei offentleg utgreiing om heilskapleg forvalting av akvakultur for berekraftig verdiskaping – NOU 2023:23 – er på høyring. Fylkesutvalet vedtok sine innspel til denne i eit møte 28. november, etter at hovudutval for næring hadde handsama saka 22. november.

Utvalet bak rapporten har sett på korleis løyvesystemet for akvakultur bør innrettast. Forslaga byggjer på målet om å oppnå størst mogleg verdiskaping innanfor berekraftige rammer. Fylkesordførar Jon Askeland (Sp) meiner utgreiinga er for utydeleg i dei overordna måla.

Fylkesutvalet meiner at det må vera eit mål at havbruket påverkar miljøet minst mogleg, samstundes som høg produksjon, verdiskaping og sysselsetting vert sikra.

– Nullvisjon er realistisk

– Dette inneber at næringa, det offentlege og forskingssektoren tek eit krafttak for å sikra eit berekraftig havbruk i framtida. Teknologien er komen langt. Med tydelegare krav og insentiv for å redusera negativ miljøpåverknad er ein nullvisjon mot rømming og vedvarande låge nivå av lakselus i nær framtid ikkje urealistisk, seier Askeland på vlfk.no.

Utgreiinga føreslår ei rekkje endringar som skal bidra til betre arealplanlegging og at selskapsløyve til andre artar enn laks, aure og regnbogeaure bør avgrensast i tid. Nokre forslag gjev sterkare insentiv til å bidra til betre miljøtilstand og fremjar utvikling og bruk av utsleppsreduserande teknologi.

Overføring av nedtrekk

Fylkesutvalet kjem med mellom anna desse innspela:

• Det må snarast gjerast endringar i regelverket som gjev miljøteknologi fortrinn. Nærings- og fiskeridepartementet kan opna for at nedtrekk i lakseproduksjon i «raude produksjonsområde» kan overførast til anlegg og lokalitetar med teknologi som ikkje bidreg til utslepp av lakselus. Dette bør skje allereie når forskrift om kapasitetsjustering i 2024 vert fastsett.

• Mangfaldet i næringa må sikrast gjennom lik handsaming av store og små oppdrettsselskap.

• Vestland fylkeskommune er samd i at kunnskapsgrunnlaget må bli betre, og støttar forslaget om å samla relevant kunnskap i ein felles, digital infrastruktur.

• Fylkeskommunen meiner at kommunane og fylkeskommunane er best eigna til å ha ansvar for planar i sjøområda, med bakgrunn i fagkunnskap og eksisterande strukturar for samordning.

• Bortfall av undervisingsløyve vil svekkja dei vidaregåande skulane sitt undervisingsopplegg innan akvakulturfaget. Skulane nyt godt av inntekter frå ordninga, noko som gjer at dei kan styrkja tilbodet innan yrkesfag totalt sett. Ordninga med undervisningsløyve må vidareførast.